Сè повеќе луѓе се соочуваат со недостаток од витамин Д
Објавено во: Мои пари 29 Август, 2016
Главната улога на витаминот Д е да му помага на организмот да ги искористи калциумот и фосфорот, минерали кои се од суштинско значење за здравјето на коските и забите. Покрај тоа, витаминот Д е одговорен за интестинална апсорбција и на железо, магнезиум и цинк. Истражувањата во светски рамки укажуваат на сè почести случаи на недостаток на витамин Д, што предизвикува различни здравствени нарушувања. Недостатокот на витамин Д може да се должи на повеќе причини, а најчести се недоволна консумација на храна богата со овој витамин и ограничена изложеност на сончева светлина.
Здравствени ризици од недостаток на витамин Д
Без разлика на причината за појава на недостаток од витамин Д, тоа доведува до намалена апсорбција на калциум и претставува ризик по здравјето. Болки во коските и мускулите, чувство на слабост и изнемоштеност, како и потемнета кожа се едни од можните симптоми кои укажуваат на недостиг од витаминот Д. Симптомите за многу луѓе се суптилни и заради тоа често пати не им се обрнува внимание. Сепак дури и без видна симптоматологија, недостатокот на витамин Д може да претставува сериозен ризик за здравјето. Ниските концентрации на витамин Д според најновите испитувања се поврзани со:
- Рахитис кај деца
- Остеопороза и остемалација кај возрасни
- Малигни заболувања
- Автоимуни заболувања
- Зголемен ризик за летален исход од кардиоваскуларни заболувања
- Астма кај децата
- Когнитивно оштетување кај возрасни и постари лица
- Проблеми со тироидна жлезда
- Намален имунитет кај сите возрасти и склоност кон алергии
- Мултиплекс склероза
- Зголемен крвен притисок
- Дијабетес (тип 1 и 2)
Најново истражување од Биотек Лабораторија
Една од најпопуларните услуги на Биотек Лабораторија во изминатиов период е токму испитувањето на витамин Д. Анализата се работи со потполно автоматизирана метода (VIDAS 25OH Total), со која се добива квантитативен резултат и се докажува присуство на двете активни форми на витаминот Д (Д2 и Д3)
„Во изминатите два месеци во Биотек Лабораторија направивме испитување на концентрациите на витамин Д кај 71 испитаник, 45 жени и 26 мажи, на возраст од 20 до 94 години. Резултатите покажаа дека поголем дел од испитаниците, 49 (69%) имаат дефицит на витаминот Д (< 20 ng/ml), а од нив 14 (29%) имаат вредности пониски од 10 ng/ml. Дефицитот е присутен во сите возрасни групи на испитаници, кај двата пола. Нормални вредности (или доволно) на витаминот Д (30–100 ng/ml) имаат 14 испитаници (20%).
Ортопедот Др. Горан Видоевски ја објаснува сериозноста од нарушување на нормалните вредности на витаминот Д во организмот:
„Сериозен недостиг на 25 (OH) витамин Д може да доведе до нарушување на минерализацијата на новоформираната коска кај новородените, што резултира со рахитис кај децата и остеомалација кај возрасните. Рахитисот претставува омекнување и слабеење на коските кај децата. Остеомалацијата е нарушување во изградбата на коските, од кое тие стануваат послаби и помеки.
Слаб до умерен дефицит може исто така да има последици врз целокупното здравје и коските на луѓето. Последиците од недостаток на витамин Д и на другите органски системи, покрај коските, сè уште не се целосно познати, но може да вклучуваат зголемена подложност на инфекции и зголемен ризик од одредени видови на рак.
Ниските вредности може да се последица на заболувања на бубрезите, кога се попречува нормалниот метаболизам на витаминот Д и појавата на активна форма, како и при намалената активност на ПТХ (паратироидниот хормон).
Зголеменото ниво на витамин Д исто така укажува на нарушување на здравствената состојба. Се јавува ретко, обично по продолжена изложеност на екстремно високи дози на витамин Д, најмногу поради консумирање на мултивитамини и додатоци во исхраната.
Високото ниво на овој витамин може да се должи на: хиперактивен ПТХ (паратироидниот хормон), затоа што паратхормонот ја стимулира синтезата на 1,25 (OH)2 витамин Д при одредени болести, како што се саркоидоза и некои лимфоми. Кога оваа форма на витамин Д се формира надвор од бубрезите овој параметар не е добар показател за токсичните дози на витамин Д.“