СЕ ОТВОРА ЛИ НОВ КЛАСТЕР ВО ШТИП: Тројца заразени со вирусот во ЈП „Исар“

Добивај вести на Viber

Од денеска и во Јавното претпријатие „Исар“ во Штип има три случаи потврдени со корона вирусот. Во зградата на ова јавно претпријатие се вработени 30-тина луѓе кои, како што велат за Фактор, целосно ги почитуваат мерките и протоколите за заштита од корона вирусот, но некои од новозаразените имале контакти со инкасаторите кои се постојано на терен.

-Во ЈП „Исар“ навистина многу се внимава, маските практично и не ги вадиме, постојано правиме дезинфекција на рацете, како и на самите простории и работните површини. Едноставно не ни се верува како е возможно да се пренесе заразата на толку внимавање. Дел од заразените се инфицирале од колегите инкасатори кои работат на терен, а како што веќе цела Македонија знае, во Штип, низ градот, на улиците, кафулињата, воопшто не се носат маски, а да не зборуваме за држење растојание, потенцираат изворите на Фактор.

Останатите вработени нема да бидат тестирани на Ковид-19, освен во случај да појават симптоми, сепак, постои опасност, сосема слично како и штипските конфекции, ЈП „Исар“ да биде нов кластер на корона вирусот во Штип.

Во штипскиот Центар за јавно здравје има голем број граѓани кои чекаат да им биде земен брис, така што само во текот на вчерашниот ден имало дури 100-тина граѓани, за кои денеска се чекаат резултатите.