СДСМ одлучи да не прави митинзи, но ќе организира мали средби со граѓани

Добивај вести на Viber

Социјалдемократскиот сојуз на Македонија донесе одлука да не организира митинзи пред парламентарните избори, за кои инсистира да се одржат до крајот на јуни. Ова денеска го потврди портпаролот Костадин Костадинов, кој рече дека тоа ќе важи за кампањата поради корона-кризата.

Пратеникот, сепак, вели дека не се исклучува можноста за организирање на непосредни мали средби со граѓани согласно мерките за заштита.

„Во делот на тоа како би ја воделе кампањата, како би ги претставувале нашите кандидати секако и програмата, фокус ќе биде ставен на медиумското претставување преку онлајн видео настани и секако имаме различни видови на дигитална комуникација. Единствено нешто на коешто може да сметаме и да размислуваме во периодов е организирање на мали средби, секако согласно протоколите и максимално почитување на препораките на здравствените власти“, рече тој.

Костадинов уште еднаш повика на одржување избори во најкраток можен рок, односно веднаш по завршувањето на вонредната состојба, за која се очекува денеска да биде продолжена по седницата на Советот за безбедност кај претседателот Стево Пендаровски.