Расте побарувачката за потрошувачки и станбени кредити

Добивај вести на Viber

Живот на кредит. Вака би се опишал македонскиот граѓани на кој подигнувањето на потрошувачки или станбен кредит му стана секојдневние.

Податоците на Народната банка покажуваат раст на побарувачката на потрошувачките и станбените кредити од  0,9% и 0,8% во септември, додека годишниот раст изнесува 14,8% и 13,8%, соодветно. 

Пад е регистриран кај автомобилските кредити, каде кредитната активност паднала како на месечна основа (за 2,6%), така и на годишна основа (за 27,2%).

Кредитите одобрени на кредитни картички бележат минимален месечен и годишен пораст, додека негативните салда на тековните сметки бележат месечен пад од 0,8%, наспроти годишниот раст од 3,5%. 

Кредитите одобрени по други основи бележат месечно зголемување од 1,1%, додека на годишна основа се зголемени за 10,4%. 

Вкупните кредити во септември се зголемени за 0,5% на месечна основа, додека на годишна основа стапката на раст изнесува 2,5%, при поголем придонес на кредитирањето на домаќинствата. Треба да се има предвид дека годишните промени на кредитите ги одразуваат и ефектите од Одлуката на Народната банка во однос на нефункционалните пласмани, покажуваат уште податоците на Централната банка.

За разлика од нив кај вкупните кредити на корпоративниот сектор е евидентирано месечно зголемување од 0,3%, додека на годишна основа кредитниот раст четврти месец по ред е во негативната зона (-1,2% во септември 2016 година). 

Доколку, пак, се исклучи ефектот од преносот на сомнителните и спорни побарувања од билансна во вонбилансна евиденција согласно со Одлуката на Народната банка, кредитниот раст на корпоративниот сектор би изнесувал 5,3%.