Прво па машко! Колкава дивиденда ќе подели УНИ Банка?
Објавено во: Финансии 16 Септември, 2022
Два милиони евра во дивиденда ќе подели УНИ Банка на сите свои акционери кои имаат акции со право на глас. Оваа деловна банка за прв пат во својата историја исплаќа дивидена и тоа е многу пријатна вест за сите инвеститори особено во овој период кога сите гледаат со крајна воздржаност на вложувањата општо на берзите заради екстерните фактори
УНИ Банка објави многу пријатна вест која беше како нарачана да ја разбие мрачната и летаргична атмосфера која завладеа во домашната инвеститорска јавност. Управата на банката предлага акционерите да одобрат поделба на дивиденда од 220 денари во бруто износ односно 198 денари (3,2 евра) по акција. Оваа официјална вест веднаш позитивно делуваше на цената на таа акција која порасна на тргувањето вчера за 10 отсто и достигна 3.100 денари за акција. Во однос на последната пазарна цена приносот во нето износ би бил над 6 отсто.
УНИ Банка е средна по големина банка на нашиот пазар која солидно се справува со острата конкуренција во нејзиниот пазарен сегмент.
УНИ Банка пријатно изненади најголем дел од домашната инвеститорска јавност со тоа што за прв пат во нејзината историја доделува дивиденда на своите акционери.
Скепсата кај значаен број од домашните вложувачи во акции настана пред четири години кога УНИ Банка најави, а потоа и оствари, перпетуална корпоративна обврзница. Овој финансиски инструмент беше наменет за познати купувачи и на нив им гарантира исплата на камата повисока од пазарната без дефинирана отплата на главницата односно на вложените средства.
Но сепак по неколку години чекање УНИ Банка направи потег за пофалба и во значаен момент даде голема поддршка за развојот на корпоративната дивидендна култура и се вброи на листата компании чии акции се котирани на нашата берза и дели дивиденда на своите акционери.
Дивидендата ќе се исплати на сите обични акции на 17 ноември годинава, а последен ден на тргување со право на дивиденда е 31 октомври. Вкупниот износ на дивиденда што ќе ја исплати оваа банка е 2 милиони евра.
За првите шест месеци годинава оваа банка е во добивка од 1,7 милиони евра односно 6,2 евра по акција.
Р. Ф.