„ПРЕТСЕДАТЕЛКАТА ДА НЕ ГО ПОТПИШЕ УКАЗОТ ЗА ЗАКОНОТ ЗА УРБАНИСТИЧКО ПЛАНИРАЊЕ“: О2 Иницијатива се крена на нозе, еве што порачуваат

Добивај вести на Viber

О2 иницијативата со реакција за новодонесениот Закон за урбанистичко планирање. Бараат претседателката Гордана Силјановска Давкова да не го потпише указот.

„Со 64 гласа „за“ и 11 „против“ се изгласаа експресно измените на законот за урбанистичко планирање.

Ниту еден пратеник не зема збор да дискутира.

Вчера попладне бевме поканети да присуствуваме на денешната комисија за транспорт, дигитална трансформација, животна средина и просторно планирање, каде меѓу другите член е и Исмаил Јахоски од ДУИ, чиј син официјално е сопственик на нафтената компанија Пуцко Петрол, која е и градежен инвеститор. Кој апсурд, вакви лица да ни одлучуваат за јавен интерес и закони каде имаат приватен интерес.

Присуствувавме на почетокот на комисиската седница каде ги образложивме нашите забелешки и потребата ваков закон со огромни импликации по сите во државава да се носи по редовна постапка и со јавна расправа.

 Но, членовите на комисијата го изгласале во целост без никакви измени, за само неколку часа подоцна да се изгласа на пленарна седница, каде министерот за транспорт Александар Николоски изјави дека јавноста нема осонова за грижа, зошто тој за најголемиот дел од околу 600 урбанистички планови, кои ќе продолжат да се изработуваат по стари и неважечки закони и правилници, нема да даде согласност. Фрапантна изјава, која укажува не на почитување на законите, туку на земање на работите во свои раце и апсолутно дискреционо право. Основа за масовна корупција.

Јавно се обраќаме до претседателката на државава Гордана Силјановска Давковада не го потпише указот за прогласување на Законот за изменување и дополнување на Законот за урбанистичко планирање и го врати законот на повторно разгледување во Собранието со задолжителна јавна расправа.