ПОЗНАТА СУМАТА КОЛКУ ЌЕ ЧИНИ УДЕЛОТ НА ДРЖАВАВА ВО ТЕРМИНАЛОТ ВО АЛЕКСАНДРУПОЛИ - парите за 10 отсто веќе се на сметката на АД НЕР

Добивај вести на Viber

Сума од 10 милиони евра е веќе исплатена од државната каса, за купување на 10 проценти од гасниот терминал Александруполи во Грција. Оваа информација претходно не беше објавена во јавноста, а за Фактор вчера ја потврди Бајрам Реџепи, директор на АД НЕР, државната компанија за изградба на гасоводот во земјава.

На средината на минатиот месец Министерството за економија му исплатило сума од 10 милиони евра на АД Национални енергетски ресурси. Тоа го покажува платформата Отворени финансии, од која се гледа дека трансакцијата се случила на 14 април годинава, при што Економија исплатиле точна сума од 624.998.989 денари, односно 10,16 милиони евра.

Фактор го праша директорот на АД НЕР Бајрам Реџепи, со која цел му се исплатени овие средства на државното акционерско друштво.

Реџепи објаснува дека овие пари се добиени бидејќи преку АД НЕР ќе оди плаќањето на 10 те отсто што Македонија ќе ги купи од гасниот терминал во Александруполи, чија изградба, со голема свеченост, стартуваше пред два дена.

„Веќе се потпишани меморандумите со акционертите од кои нашата држава ќе ги купи акциите. Практично, ние ќе купиме по два отсто од петте акционери на терминалот, со што ќе обезбедиме 10 отсто од акциите“, вели Реџепи за Фактор.

Тој во нашиот телефонски разговор вчера ни изјави дека веќе е во Софија, Бугарија, заедно со министерот за економија Крешник Бектеши, токму со цел за реализација на купувањето на планираните 10 отсто од акциите од гасниот терминал во Грција.

А министерот за економнија, Крешник Бектеши, пак, вчера објави фотографија заедно со бугарскиот и грчкиот министер, нагласувајќи дека е тоа „зазголемена безбедност во снабдувањето со природен гас, и диверсификација на извори!“.

Бектеши информираше дека вчера во Софија заедно со колегите министри од земјите од регионот и ЕУ разговарале за енергетската безбедност, потребата за итна рекација во нарушувањето со снабдување со енергенси како резултат од кризата во Украина, декарбонизацијата и зелената транзиција, како и за формирањето на првата регионална платформа на ЕУ за набавка на гас во рамки на сеопфатната платформа на ЕУ.

„Регионот произведува многу историски прашања и потребно е во овие тешки времиња неопходно е да се трегне историјата настрана. Ги повикав моите колеги на солидарност заеднички да изнајдеме решенија кои ќе бидат во интерес на сите земји.На Министерскиот состанок за енергетика во Софија беше формирана новата регионална платформа на ЕУ за набавка на гас која ги вклучи и земјите од Западен Балкан. Во оваа платформа свое учество има и Северна Македонија“, напиша Бектеши на Фејсбук.

Инаку, јужниот коридор ја намалува зависноста од досега единствениот канал на доток на гас од Русија.Поточно, со овој проект наместо во нашата држава да биде присутен само еден извор на гас, сега е отворена можноста да влезе и снабдување од повеќе различни извори, како гасот од САД, Блискиот Исток и други земји.

Нашата држава потпиша меморандум според кој ќе располага со 10 отсто од акциите во овој терминал. Сепак, за да дојде тој гас во земјава, треба да заврши и изградбата на гасоводот кај нас. Според најавите, во јуни треба да се објави јавниот повик, а цевководот да биде готов во следните 18 до 20 месеци, а тогаш и се проценките дека ќе заврши изграбата на гасниот терминал.

„Обезбедувањето на природен гас како енергенс за компаниите и домаќинствата ќе доведе до намалени трошоци, но и до намалување на загадувањето и заштита на животната средина, односно подобри услови за живот на граѓаните. Гасниот терминал е од огромно значење за регионот и од аспект на диверзификација и поголема сигурност во снабдувањето со природен гас со отворањето на овој дополнителен гасен коридор“, изјави од Грција премиерот Димитар Ковачевски.   

Кирјакос Мицотакис, пак, премиерот на Грција, рече дека нашиот полуостров може да има свое место во стратегијата за енергетска транзиција на целиот континент.

„Со овој, но и со други планирани проекти набргу ќе може рускиот гас да се замени со други извори, а конкретните земји може да имаат клучна улога на новата енергетска мапа“, нагласи тој.

Инаку, како што беше објавено, терминалот ќе се состои од пловечки објект во кој ќе се чува енергенсот, a ќе стига во цистерни со бродови.

Според премиерот Ковачевски, ова ќе влијае и на намалувањето на цената на гасот како енергенс за индустриските и енергетски капацитети во земјава.