Полицајки со шамија и во Турција
Објавено во: Балкан 30 Август, 2016
На официјалната церемонија по повод денот на победата во Турција денеска за првпат можеа да се видат жени во полициски униформи, дополнети со нов додаток - шамија под капата.
Ова стана возможно по промена во регулативата за облека на вработените во системот за безбедност во земјата. Весникот „Хуријет" наведува дека на плоштадот Таксим во Истанбул полициска инспекторка го привлекла вниманието, кога се појавила во униформа, но со хиджаб под капата. Во составот на турската полиција и во специјалните единици има многу млади жени кои се рамноправно меѓу мажите. Денеска на Таксим десетици жени полицајки беа вклучени во засилените мерки по обезбедувањето на церемонијата. Празникот беше одбележан со положување на венци пред споменикот на Кемал Ататурк и едноминутно молчење во спомен на загинатите, и заврши со интонирањето на националната химна. Исто денес поранешниот директор на полицијата во Истанбул Хусеин Чапкан со одлука на судот беше притворен, откако беше уапсен во Измир под сомневање за врски со проповедникот Фетхулах Гулен.