ПОЛИЦИСКИ ЧАС ОД 23 ДО 05 ЧАСОТ ДО 15.МАЈ: По десет дена ново олабавување на мерките?

Добивај вести на Viber

Движењето на граѓаните од денеска до 15. мај е дозволено до 23 часот, односно полицискиот час ќе почнува од 23 и ќе трае до 05 часот изутрина. Ваква одлука донесе вчера Владата по препорака на Комисијата за заразни болести врз основа на анализите за епидемиолошката состојба. Истовремено се зголемува и работното време на локалите и угостителските објекти, но само на летните тераси и тоа е до 22.30.

-Од 5 мај, среда, забраната за движење со цел заштита од КОВИД-19 наместо од 21:00 часот, ќе започнува од 23:00 часот и ќе трае до 05:00 часот наредниот ден. Мерката започнува да важи од 5 мај и ќе трае до 15 мај. Соодветно на овие измени угостителските објекти ќе бидат отворени за гости до 22:30 часот и тоа само на отворените делови, тераси, на угостителските објекти, како што е утврдено со постојните мерки и наменски протоколи, се наведува во владиното соопштение по синоќешната седница.

Какви мерки ќе бидат утврдени по средината на месецов, Комисијата за заразни болести ќе одлучува непосредно пред 15.мај.

-Секојдневно ја анализираме состојбата. Веќе имаме драстично намалување на бројот на новозаразени, а со тоа во голема мера е намален и притисокот врз ковид-центрите и болниците каде се лекуваат пациентите заразени со корона вирусот. Засега може да кажеме дека имаме поповолна епидемиолошка состојба, заради што и ги олабавуваме антиковид мерките. Но, што ќе предложиме по 15. мај секако ќе зависи од актуелната епидемиолошка состојба. од епидемиолошката крива која е најголем показател за ситуацијата со Ковид-19. Откако детално ќе ги изанализираме сите параметри, ќе видиме дали ќе има дополнително олабавување на мерките, велат за Фактор извори од Комисијата за заразни болести.

Оттаму исто така наведуваат дека и во наредниот период ќе се следат бројките на новозаразени, односно целокупната епидемиолошка состојба во Македонија, па најверојатно ќе следи постепено олабавување на рестриктивните мерки. Со цел да се спречи трансмисија на некои нови соеви на корона вирусот, Комисијата за заразни болести дополнително предложи, а Владата на седницата прифати воведување мерка за задолжителна самоизолација (карантин) во траење од 14 дена за сите домашни и странски физички лица – патници кои пристигнуваат од Индија и Бразил.

-Дел од болниците полека се враќаат на тековната работа, односно престануваат да бидат ковид-центри, има голем број исписи на дневна основа, но и во овој период мора да сме внимателни. Не може се наеднаш да се олабави, зошто и досега искуството покажа дека станува збор за вирус кој е крајно непредвидлив и кој прави сериозни и многу попреносливи мутации кои даваат многу потешка клиничка слика, па и лекувањето во болнички услови трае многу подолго. Затоа препорачуваме вакви мерки, брифираат од Комисијата за заразни болести.

Во однос на вакцинацијата велат дека сега процесот непречено се спроведува насекаде во Македонија и очекуваат зголемен интерес кај граѓаните, особено по пристигнувањето на поголеми количини вакцини во земјава.

-Ние сме малубројна земја, брзо може да постигнеме колективен имунитет, но граѓаните мора да сфатат дека имунизацијата на населението против Ковид-19 е единствениот излез од пандемијата. Само така ќе можеме да ги укинеме сите рестриктивни мерки и да го вратиме „старото нормално“.

Анита Буховски