Полицајците бараат да не бидат снимани и фотографирани
Објавено во: Македонија 24 Април, 2020
Македонскиот полициски синдикат побара од медиумите во иднина кога се објавуваат видео материјали и фотографии од полициски службеници како превземаат службени дејствија истите да бидат со формат и содржина со кој ќе биде заштитен нивниот идентитет заради нивна лична безбедност и безбедноста на нивните семејства.
„Повод за ова обраќање се зачестените неосновани напади по социјалните мрежи и интернет портали каде се објавуваат видео снимки на кој се гледаат вработените во МВР како презвемаат службени дејствија на терен, со што сметаме дека на овој начин се врши психички притисок над вработените во Министерството, поради што може да настанат пропусти во работењето, а со тоа индиректно да биде загорзена безбедноста на државата и граѓаните од една страна, но и личната безбедност на вработените во МВР и безбедноста нивните семејства“, велат од синдикатот.
Побарано е и од самите граѓаните да се воздржат од снимање односно фотографирање на полициски службеници и постирање на таквите матријали на социјалните мрежи, бидејќи, како што велат од таму, тоа е неовластено и несвесно се доведува под прашање безбедноста на вработените во МВР и безбедноста на нивните семејства. Додаваат дека во иднина ќе бидат приморани да ја испитаат одговорноста на лицето кое го снимило видеото или фотографирало, односно ги објавило тие материјали на социјалните мрежи.
„Истовремено аплелираме доколку било кој граѓанин на Република Македонија има било какво сознание за злоупотреба од вработени во МВР да го пријави до надлежните институции. Во спротивно како синдикат цврсто ќе застанеме во заштита на нашите колеги и во иднина за секој поединечен случај на неовластено снимање и фотографирање ќе бидеме приморани да поведеме постапка со цел утврдување на одговорност кој сликал и зошто ги објавил односно споделил тие фотографии или видео матријали имајќи предвид дека станува збор за кривично дело неовластњно снимање, кое е инкриминирано во член 152 од Кривичниот законик на Македонија и кривично дело злоупотребa на лични податоци кое е инкриминирано во член 149 од Кривичниот законик на Република Македонија“, предупредуваат од полицискиот синдикат.