ПОДЗЕМНА СООБРЌАЈНИЦА И ЧЕТИРИ 20 КАТНИЦИ - еве на што е ангажирана турската „Лимак“ на која и открија 97 непријавени работници
Објавено во: Македонија 24 Јануари, 2021
Вчера речиси главна вест беше информацијата што пристигна од МВР, а таа е дека полициски службеници спровеле контрола на градежни објекти на фирма од Република Турција помеѓу бул.„Кирил и Методиј“ и ул.„Јордан Мијалков“ поради сомнение дека повеќе странски државјани непријавени работат на објектите и незаконски престојуваат во Република Северна Македонија, по што на објектите биле затекнати дури 97 странски државјани кои немаат регулиран престој и кои работат непријавени.
“Тие биле приведени и по целосно документирање на случајот против нив ќе бидат поднесени соодветни пријави. Исто така, соодветни пријави ќе бидат поднесени против фирмата и против 15 други фирми-подизведувачи“, се вели во соопштението од МВР.
Инаку, најголемо градилиште во тој реон од главниот град е она на турската компанија „Лимак“.
Тоа во јавноста и го поттикна интересот за тоа која е турската компанија „Лимак“, и што всушност таа гради.
Таа кај старата железничка станица треба да изгради подземна сообраќајница и голем станбено деловен комплекс со четири 20-катници.
На почетокот и на крајот од тунелот ќе се конструираат кружни текови за негово сообраќајно поврзување.
За нивна изградба одговорноста е на град Скопје.
Во рамки на проектот има и четири станбени згради, односно тоа се наведените 20 катници. Во нив ќе има вкупно 722 стана и 24 деловни простории.