ПОБРЗАЈТЕ: Потврдете ги или коригирајте ги Годишните даночни пријави
Објавено во: Економија 22 Мај, 2020
На крај на месецов истекува рокот за Годишната даночна пријава.
На 31 мај завршува рокот за потврдување или коригирање на Годишната даночна пријава.
„На 1.06.2020 година службено ќе бидат потврдени и Годишните даночни пријави што од страна на граѓаните не се ниту потврдени, ниту коригирани. Годишната даночна пријава која граѓанинот ја корегирал, а добила статус на конечна даночна пријава, ќе треба да биде одобрена од службено лице на Управата за јавни приходи. Доколку службеното лице не ја одобри корегираната даночна пријава ќе се донесе решение за утврдување на данокот на личен доход за 2019 година“, информираат од Управата за јавни приходи.
Граѓаните кои оствариле приходи, а сеуште не се регистрирале на системот е-Персонален данок, да го сторат тоа во најкраток можен рок.
Во 2019 година, Управата за јавни приходи, започна со доставување на претпополнетите годишни даночни пријави за остварени приходи во 2018 година.
Целта беше да се олесни процесот, но и да се избегне метежот во просториите на УЈП.