Пазарџиите не се откажуваат, повторно го блокираа сообраќајот во центарот на Скопје
Објавено во: Македонија 14 Јануари, 2020
Закупците на тезги од „Зелен пазар“ повторно го блокираа центарот на Скопје, изразувајќи го со протест своето незадоволство против последните одлуки на јавното претпријатие „Паркинзи на Општина Центар“.
Денеска улицата кај дирекцијата на Макпетрол, односно кај крстосницата кај катната гаража „26 Јули” е блокирана од 30-тина пазарџии поради тоа што не можат повеќе бесплатно да вршат дотур на роба и поради поскапувањето на цената за паркирање на паркиралиштето „Аутомакедонија“.
Вчера ПОЦ по протестот реагираше дека им го затворил паркиралиштето кај „Аутомакедонија“ затоа што било злоупотребувано и пренатрупувано со тешки товарни возила.
– Со воведувањето на овие мерки ЈП Паркинзи на Општина Центар ќе стави крај на неправилностите кои се случуваа години наназад и ќе направи ред во паркирањето давајќи приоритет на жителите кои живеат во опфатот на паркиралиштето „Аутомакедонија“ кои заради сите овие злоупотреби не можат да го користат паркиралиштето во близина на своите домови бидејќи секојдневно се соочуваат со неподнослив проблем со паркирањето, стои во соопштението.
Според соопштението, пазарџиите кои редовно секоја година добивале повластена паркинг карта и картичка за влез за нивните автомобили, тие истите ги користеле за тешки товарни возила. Порачуваат дека „Скопски Пазар“ треба да обезбеди дел од својата парцела за потребите на своите закупци на тезги.
Пазарџиите тврдат дека им се нарушува и онака слабиот промет на пазарот, и бараат првиот час за паркирање да е бесплатен, а за секој нареден да важи старата цена. Претходно тие протестираа и за зголемување на давачките за закупот на тезги, но тој проблем се уште не е решен.