Отворен почесниот конзулат на Кралството Мароко во Република Македонија

Добивај вести на Viber

Во присуство на дипломатскиот кор и државниот врв свечено е отворен почесниот конзулат на Кралството Мароко во Република Македонија. Република Македонија и Кралството Мароко првпат воспоставија дипломатски односи на 18ти септември 2002 година. Функцијата на почесен конзул ја извршува Илија Малинковски, назначен на оваа позиција во септември 2016 година, кој е истакнат член на заедницата којшто со својата работа придонесува за културно и економско зближување на двете земји. Свеченото отворање на конзулатот е продолжување на пријателските односи меѓу двете земји кои се карактеризираат со взаемна почит и разбирање кон стратешките цели и националните приоритети.

Двете земји во досегашната комуникација развија нагорна динамика на средби и посети на високо дипломатско и политичко ниво, а паралелно се градеа и пријателските релации.

„Kако дополнување на одличните односи меѓу Македонија и Мароко и динамичната соработка со Амбасадата на Мароко во Софија, јас сум сигурна дека активностите на Почесниот конзулат ќе отворат нови можности за зајакнување на соработката во многу области од заеднички интерес за нашите земји, особено во областите на економијата, трговијата и инвестициите, како и дека Почесниот конзулат ќе биде мост за засилена културна соработка. И двете наши земји имаат голем потенцијал во овој поглед и не се сомневам дека Почесниот конзул ќе може да даде дополнителен импулс и успешно да придонесе за натамошно збогатување на нашите односи и соработка“, изјави Н.Е. г-ѓа Арта Точи, Заменик министер за надворешни работи на Република Македонија.

На чинот на свеченото отворање свое обраќање имаше и Амбасадорката на Кралството Мароко, Нејзината Екселенција г-ѓа Закиа Ел Мидаоуи, која изјави: „Почесниот конзулат, кој е претставување на Кралството Мароко во Република Македонија, ќе послужи како катализатор за трговија и инвестиции меѓу нашите две пријателски земји. Неговата главна улога ќе биде, меѓу другото, промовирање на мароканската култура, нејзината економија и интензивирање на билатералната соработка. Оваа официјална инаугурација на Почесниот конзулат на Кралството Мароко во Република Македонија го одразува фактот дека двете земји придаваат фундаментална вредност за зајакнување на нивните билатерални односи во многу области и сектори од заеднички интерес.“

Почесниот конзулат значително придонесува за продлабочување на соработката, како и за интензивирање на економските, трговските и културните размени меѓу Република Македонија и Кралството Мароко. Сето тоа ќе помогне и ќе го стимулира просперитетот и развојот на двете земји на повеќе нивоа.

„Оваа важна функција за мене е голема чест. Културното зближување и економската соработка на двете земји е нашата мисија“, изјави, г-дин Илија Малинковски, Почесен конзул на Кралството Мароко во Република Македонија.

Свеченото отворање помина во духот на запознавање со културните наследства на двете земји низ богатата и традиционална гастрономија и етничките обележја, кои взаемно придонесуваат за и понатамошното развивање на пријателството и меѓусебното разбирање.