ОТПРЕМНИНА ОД 400 ИЛЈАДИ ЕВРА ПО ЧОВЕК: Фолксваген обештетува 20 илјади работници

Добивај вести на Viber

Германскиот производител на автомобили Фолксваген вчера објави дека 20.000 вработени веќе потпишале договор за доброволно заминување од компанијата, а околу две третини од заминувањата се однесуваат на преминот кон програма за предвремено пензионирање.

Компанијата со седиште во Волфсбург претходно усвои план за штедење кој вклучува елиминација на вкупно 35.000 работни места до крајот на деценијата, првенствено во германските фабрики, објавува Билд.

Отпремнината за засегнатите работници зависи од должината на работниот стаж и може да достигне до 400.000 евра по лице.

Менаџментот на Фолксваген и синдикатите на крајот од 2024 година се согласија за мерки за штедење за основниот бренд „Фолксваген“ кои предвидуваат намалување на трошоците за работна сила за 1,5 милијарди евра годишно.

Компанијата најави и дополнителни мерки за штедење, така што од 2026 година бројот на годишни места за обука ќе се намали од 1.400 на 600, додека 130.000 работници од брендот Фолксваген ќе мора да се согласат на период без вистинско зголемување на платата.

Планирано е пет проценти од заработката да се пренасочат кон фонд за флексибилни модели на работа, а годишниот бонус од 1.290 евра ќе биде укинат.

Синдикатот IG Metal тврди дека оваа договорена стратегија засега го спречила затворањето на фабриките на Фолксваген, но останува неизвесно дали ова ветување може да се одржи поради долгорочната криза во германската автомобилска индустрија, додава германскиот весник.