Отчетност: Колку троши директорот на ПИОМ за такси, хотели и дневници

Добивај вести на Viber

Безмалку 300 евра за такси услуги во два месеци потрошил директорот на државниот Фонд за пензиско и инвалидско осигурување (ПИОМ) Шаип Зенели. Во извештајот од алатката за отчетност што ја воведе Владата стои дека тој службено потрошил и 665 евра за угостителски услуги во странство и тоа во три месеци од оваа година. Зенели не троши секој месец на вакви потреби. 

Такси превозот го користел само во март и во мај и не е прецизирано дали е во странство или овде во земјава. За угостителски услуги пак, во странство трошел само во март, мај и во јуни.

Од трошоците, редовни му се само тие за службен мобилен телефон. Секој месец ПИОМ му плаќа на директорот на службениот мобилен по 2.450 денари.

За авионски карти трошок годинава има само во мај и тој изнесува над 40.000 денари. Во тој месец Зенељи бил на службено патување и во Албанија и во Австрија. Тие се вкупните трошоци за авионски карти иако директорот службено патувал и во март, до Брисел, но во тој месец таков трошок не е заведен.

Се разбира за патувањата земал и службени дневници. Такви му се исплатени во март, мај и во јуни и тоа вкупно 34. 886 денари за сите четири патувања. Станува збор за вкупно 10 работни дена. Толку било оправдано, службено, надвор од државата.

Хотелско сметстување пак е наведено само во јуни. За тоа служебно Зенели потрошил над 12.000 денари или околу 200 евра.

Трошоците за дневници и за угостителски услуги кои ги прикажа оваа алатка за многу од функционерите вистински ја разбрануваа јавноста. ПИОМ ги објавува на редовна основа.  

А.Т.