ОСМАНИ: Законите за промена на имињата на МРТ и на МАНУ стојат заглавени пет години
Објавено во: Македонија 13 Јуни, 2024
Шефот на македонската дипломатија, Бујар Османи во однос на Грција вели дека не ни треба кавгаџиска надворешна политика.
Според него, како што ја обвинуваме Грција дека не ги исполнила сите обврски, нив не ги исполнила и Македонија, затоа што законите за промена на имињата на МРТ и на МАНУ стојат заглавени пет години во Собранието.
Додаде дека столбот на Преспанскиот договор е давањето поддршка од Грција за нашата интеграција во ЕУ и во НАТО, а таа обврска е исполнета и не треба да се загрозува со споредни прашања.
„Ако сакаме да најдеме мани, може да најдеме и во односите со САД“, изјави Османи.
Околу најавата на лидерот на ВМРО-ДПМНЕ, Христијан Мицкоски дека подготвиле документ во кој стојат сите обврски што не се исполнети од Грција, Османи рече дека место да го пишувале требало само да побараат таква листа од МНР, бидејќи имплементацијата на Преспанскиот договор во ова Министерство се следи на дневна основа.
„Да не бараме проблеми кај што нема. Нам ни е важно Грција да биде наш поддржувач. Се надевам дека со градење на добра атмосфера Преспанскиот договор целосно ќе се применува“, порача Османи/
Тој порача притоа дека изборите завршија и дека нема повеќе потреба од креирање на ваква клима во односите со Грција.
Земјава и Грција го потпишаа Договорот од Преспа на 17 јуни 2018 година во Нивици за решавање на спорот со името.
„Оксиморон е едната страна да бара од другата да го изоди целиот пат, од моментот кога ги нема изодено првите метри, што се однесуваат на првото и основното, ерга омнес за името“, рече портпаролот на грчката Влада Павлос Маринакис на денешниот редовен брифинг со новинарите, одговарајќи на прашањето на дописничката на МИА од Атина.
Грција претходно се закани со вето ако Македонија не го почитува Договорот од Преспа.
фото Фејсбук/Бујар Османи