„ОхридТурист“ го промени составот на УО со нови луѓе од „Тиквеш“ и „М-6“, додека трае спорот со вториот акционер за продажба на имотот

Добивај вести на Viber

„ОхридТурист“, компанијата сопственик на хотелот Палас и неколку други угостителски и туристички објекти, го промени составот на Управниот одбор со нови три члена кои доаѓаат од „Тиквеш“, односно од М-6 групацијата која е мнозински сопственик.

Оливера Ставрова, менаџер за финансии во ВВ Тиквеш, останува генерален директор, а исто и адвокатот Филип Медарски, како член на УО. Четиригодишниот мандат им истече на Борче Илиоски, Златко Ивановски и Снежана Славкова. Наместо нив, нови членови на УО на „ОхридТурист“ се Драгана Јаневска, ќерката на Светозар Јаневски, како и Кастриот Арифи и Искра Клинкарова кои доаѓаат од М6 Инвестиции.

Останува да се види дали новото раководство, на барање на вториот акционер „Екстра Скопско“, по повеќе од две децении неработење на објектот, ќе издејствува решение за хотелот „Палас“ во Охрид, изграден во далечната 1958 година. Според она што може да се заклучи од записниците од последните седници, „Екстра Скопско“ од раководството бара реконструкција и адаптација со современ изглед на некогашниот репрезентативен угостителско-сместувачки бисер на Охридската ривиера.

Во 2016 година имаше најава за комплетна реконструкција на хотелот Палас, но тоа не се случи. И во последните години имаше неколку настани и работни состаноци на кои се бараше решение за објектот за кој повеќе од две децении нема епилог Инаку, хотелот „Палас“ е прогласен за споменик на културата и како таков е ставен под посебна заштита. Според сегашните околности, негово уривање не е можна опција, така што решението за неговата иднина треба да се бара преку негова реконструкција.

Во моментов во акционерското друштво владее и спор помеѓу вториот акционер „Екстра Скопско“ и М-6 околу условите и намерите да се продадат хотелот „Десарет“, комплексот „Летница“ и објектот „Ориент“ во Охрид преку објавување на оглас за прибирање на понуди.

„Екстра Скопско“ го бара својот удел преку поделба на друштвото бидејќи, како што веќе имаат известено од таму, раководството не нудело развоен концепт, туку имало намера само да го распродаде имотот. Во меѓувреме имало и предлог пред собранието на акционери да се заложи имотот на хотелот „Десарет“ за повлекување на кредит од околу 11 милиони евра за потребите на М-6.

„ОхридТурист“ поседува и свое земјиште, рестораните „Билјанини Извори“ во Охрид и „Острово“ кај Свети Наум, како и автокампот Љубаништа.

А.К.