ОД ФОРБС ПРЕСМЕТАА: Русите досега потрошиле 82 милијарди долари на воената операција во Украина

Добивај вести на Viber

Проценките на Форбс покажуваат дека Русија потрошила четвртина од својот годишен буџет за војната во Украина. Форбс објави дека Русија потрошила 82 милијарди долари за својата инвазија во текот на првите девет месеци од војната, додека минатогодишниот приход на рускиот буџет бил 340 милијарди долари.

Оваа проценка ги вклучува само директните трошоци за воената операција на Русија во Украина и не ги вклучува трошоците за одбрана или економските загуби предизвикани од западните санкции. Форбс тврди дека во исто време се намалуваат буџетските приходи од извозот на нафта и гас, откако Русија изгубила поголем дел од европскиот пазар на гас, пренесува Sky News.

Трошоците за војната се удвоија во текот на есента, така што Русија троши минимум 10 милијарди долари месечно за својата инвазија. Трошоците предизвикани од инвазијата вклучуваат плати за воените трупи, компензација за загинатите и ранетите во борба, купување или производство на оружје и муниција и замена на изгубената опрема.

Форбс објави дека Русите потрошиле повеќе од 3,5 милијарди долари за компензација за загинатите и ранетите во последниот месец од војната. Исто така, тие пресметале дека Русите трошат меѓу 10 и 50 илјади гранати дневно, при што просечната цена на искористените гранати од советски калибар е околу илјада долари.