Обвинителството замрзна 3 милиони евра на фирмата Руд-Коп која копаше јаловина за РЕК Битола

Добивај вести на Viber

Основното јавно обвинителство Битола поднесе обвинение против седум лица од ЕСМ кои незакоснки му овозможиле екстра заработка од178.370.319 денари на операторот Руд-Коп за ископ на јаловина во рудникот Брод Гнеотино на РЕК Битола. Средствата на фирмата на Кирил Билјановски се замрзнати,како што информира Обвинителството.

Обвинение е поднесено и за 3 службени лица од Бирото за јавни набавки, членови на Стручната комисија со овластување да извршат евалуација на понудите на јавна набавка за избор на фирма за ископ на јаловина во РЕК Битола, кои „елиминирале“ конкурентска фирма да не може да учествува на тендерот.

„Обвинетиот директор на РЕК Битола го прифатил предлогот за избор на најповолна понуда содржан во Извештајот на Комисијата за спроведување на јавната набавка иако бил спротивен на одредбите од Законот за јавни набавки и на 03.10.2022 склучил договор за ископ на инвестициска откривка во Рудникот Брод Гнеотино со РУД-КОП увоз-извоз ДООЕЛ Битола во износ од 708.000.000 денари со ДДВ. Потоа, во септември 2023 година, директорот склучил и анекс кон договорот со кој вредноста на јавната набавка ја зголемил за дополнителни 20% односно за 120.000.000 денари, со што исто така постапил спротивно на Законот за јавните набавки, бидејќи претходно не извршил дополнителна анализа на исплатливост и не ги дообезбедил потребните парични средства кои според законските одредби требало да бидат обезбедени во целост пред склучување на договорот.

Службените лица од Бирото за јавни набавки, обвинети за несовесно работење, извршиле увид во целокупната документација поврзана со јавната набавка и требало да утврдат дека понудата на еден економски оператор е незаконски отфрлена, но тие пропуштиле тоа да го сторат и на договорниот орган противправно му дале инструкции да продолжи со постапката за јавна набавка и да го склучи договорот“, објасни Обвинителството.