Објавувањето на платите не ги поколеба: Машиновозачите и денеска не работат
Објавено во: Економија 06 Февруари, 2020
И денеска машиновозачите нема да работат, а железничкиот сообраќај е трет ден во прекин. Продолжува барањето за зголемување на надоместот за квалитет на работа од 30 на 40 проценти, што е всушност зголемување на платата за околу 10 проценти. Машинскиот персонал за МИА потврди декан денеска заминале само два товарни воза и оти се соочуваат со притисоци да продолжат со работа.
Најново е тоа дека во текот на вчерашниот ден од раководството им било побарано секој машиновозач и помошник машиновозач да потпише поединечна изјава дали ќе ги извршува работните обврски.
Раководството на МЖ Транспорт вчера објави дека прекинот е незаконски и дека претпријатието со тие долгови нема финансиски можности да го исполни нивното барање.
„Незаконитиот прекин на работа, односно штрајк, не е организиран согласно ЗРО и Колективниот договор на ЖРСМ Транспорт АД-Скопје и истиот не е предизвикан поради социјален момент или други услови со извршување на работните задачи, туку од лична корист на машиновозачите кои имаат месечни парични примања во износ за октомври 2019 година во износ 44.955 денари, за ноември 2019 година во износ 44.070 денари и за декември 2019 година во износ 47.665 денари“, соопшти вчера управата на МЖ Транспорт.
Од таму додадоа дека вчера еден од машиновозачите којшто се обидел да ги заврши работните обврски добил закани по живот од непознато лице на телефон и дека случајот е пријавен во полиција.
– Вработениот, кој не го почитувал незаконскиот штрајк од страна на Машиновозачите предводени од Претседателот на Синдикалната организација НСМПМ – Машиновозачот Душко Чакаровски и започнал со работа во 19 часот, веднаш потоа преку телефонско јавување од непознат број, со погрдни зборови му е претено и заканувано со зборовите „тргнеш ли, ќе ти ги скинеме нозете“, додека настрана од него во темнината стоеле луѓе кои му дофрлале погрдни зборови, со што бил видно исплашен за своето здравје и живот, не можел да го издржи притисокот и не бил во состојба да ги изврши своите работни задачи – велат од МЖ Транспорт.