ОБДУКЦИЈАТА ПОКАЖАЛА: Смртта на постарата жена во Хрватска нема никаква врска со вакцинацијата од ковид

Добивај вести на Viber

Вили Берош, хрватски министер за здравство, потврди дека 82-годишна жена починала во дом за стари лица во Чаковец, еден ден откако била вакцинирана.

Но, како што нагласува, нејзината смрт нема врска со вакцинацијата, и е предизвикана од срцева слабост.

„Таа беше вакцинирана на 27 декември, а госпоѓата почина следниот ден поради одредени форми на срцева слабост. Добивме извештај од обдукцијата. По вакцинацијата, таа беше во добра состојба, следното утро сè беше во ред, околу 17 часот нејзината состојба се влоши, ја повикаа брзата помош, но таа почина еден час подоцна“, рече Берош.

Кај оваа жена бил земен брис за ковид-19, и наодот бил негативн, а обдукцијата покажала дека пациентката починала од срцева слабост, предизвикана од сериозни промени во срцевите садови. 

„Таа страдаше од астма, имаше нарушувања во голтањето, имаше сонда, не можеше да оди сама“, нагласи хрватскиот министер за здравство, наведувајќи уште некои други дијагнози на починатата жена.

Според него, нејзината смрт нема никаква врска со вакцинацијата.

„Настанот ќе биде пријавен во ХАЛМЕД и ќе продолжи да се проценува, но Комисијата утврди дека смртта нема никаква врска со вакцинацијата“, рече Берош.