Добивај вести на Viber
Лидерите на Демократската левица и на социјалистичкиот ПАСОК во Грција се спротивставија на новите реформи кои од Атина ги бара меѓународната „тројка“ кредитори. И по состанокот со премиерот Андонис Самарас, тие нагласија дека нема да ги прифатат плановите за воведување дополнителни намалувања на платите.
Според Фотис Кувелис, лидерот на Демократската левица ако се исполнат неприфатливите барања на тројката, тие ќе предизвикаат уште повеќе отпуштања, ќе ја зголемат невработеноста и рецесијата па ниту тој, ниту пратениците на Демократската левица нема да гласаат за таквите мерки. За Евангелос Венизелос од ПАСОК, неоправдано и провокативно било сега да се решава прашањето за реформите во трудовата политика иако промените нема да придонесат Грција да ги исполни фискалните цели. Друго прашање кое било пречка во текот на разговорите било противењето на ПАСОК за предлогот на германското Министерство за финансии за создавање депонентна сметка на која ќе се ставаат траншите од заемот за Грција и даночните приходи на земјата и врз која ќе има надворешна контрола.
Владата на Самарас повеќе месеци паралелно преговара со шефовите на владејачките партии и со челниците на меѓународните кредитори - ЕК, ЕЦБ и ММФ околу пакетот мерки за штедење во износ од 11,5 милијарди евра.