Невидени турканици пред ковид-центарот на ГОБ „8 Септември“: Директорот Костов уверува дека сите ќе бидат прегледани
Објавено во: Македонија 27 Ноември, 2020
Утринава огромен
број граѓани се обидувале да стигнат на ред да бидат прегледани во ковид-центар
во ГОБ „8 Септември“, а по социјалните мрежи веќе има видеа од турканиците меѓу
луѓето. Некои од нив, исто така на социјалните мрежи, пишуваат дека чекале и по
неколку часа за да стигнат на ред.
Видео на својот профил на Фејсбук објави и новинарот Фуркан Алиу.
-Што да правиме, кога ни е кажано да дојдеме на контрола. Ова е невозможно, велат пациентите кои стојат пред ковид-центарот.
За ваквата ситуација го прашавме директорот на болницата, д-р. Христијан Костов, кој вели дека е н ормално да има гужви, кога само до 13.00 часот биле прегледани дури 90 пациенти.
-Секако дека ќе има вакви ситуации. Освен што до сега се прегледани 90-тина луѓе, до 16.00 часот ќе бидат прегледани најмалку уште 70 пациенти. Сите имаат бројчиња, но гужвата се создава бидејќи некои од нив по два пати доаѓаат, зошто претходно биле упатени на рентге, во лабораторија, па чекаат резултати, па со резултатите мора повторно да се вратат тука. Нормално е и некои од нив да бидат нестрпливи, заради што редот го одржува обезбедувањето на болницата, посочува директорот Костов за Фактор.
Д-р. Костов, истовремено нагласува дека во ниту еден случај пациентите нема да останат непрегледани.
-На крајот на денот сите ќе добијат соодветна здравствена услуга. Пациентите не ги пуштаме да си заминат непрегледани и без терапија. Функционира непречено и дневната болница, каде оние со средно тешка клиничка слика примаат инфузии. Секојдневно, во изминативе два месеца, тука се вршат прегледи на околу 150 до 200 пациенти дневно. Како и да е, во ГОБ „8 Септември“, во моментов се хоспитализирани 105 пациенти, имаме уште 4 слободни места, но секојднево испишуваме најмалку по 10-тина оздравени пациенти, вели д-р. Костов.
Анита БуховскиФотографијата и видеото се преземени од колегата Фуркан Салиу