Недела ќе биде неработен ден, но ќе има исклучоци

Добивај вести на Viber

Недела ќе стане неработен ден, но ќе има и исклучоци. 

„Недела неработен ден“ е законско решение за постигнување социјална рамноправост и заштита на работничките права. 

На  седница на економско социјалниот совет денеска се разгледуваше драфт текстот за законското решение за „недела неработен ден". Трипартитниот дијалог ја потврди намерата на Владата, недела да се прогласи за неработен ден. 

За нормално функционирање на државата факт е дека ќе има можност одредени работодавачи/правни субјекти да работат но само во определени дејности и тоа само оние работодавачи кои ќе можат да покажат дека технолошко-производствените процеси не смеат да се прекинат (значи не сите работодавачи во тие определени дејности!). Останатите работодавачи (и тие работодавачи чии технолошко-производствени процеси смеат да се прекинат во наведените дејности а и сите работодавачи во дејностите кои не се наведени во исклучоците) нема да смеат да работат.

Во случај да го прекршат законот и да работат во недела, тогаш ќе следи соодветна ригорозна казнена мерка.

За работниците во дејностите кои ќе спаднат под исклучоците, работодавачите ќе треба да им го платат работењето во недела согласно законите и колективните договори и ќе треба да одредат друг ден кој ќе биде ден за неделен одмор.

Предлог законот за работни односи, од кој дел е и решението „недела неработен ден“ е се уште во работна верзија и се консултира со сите засегнати страни. Синдикатот бараше недела да биде неработен ден. Италија, Франција, Португалија, Унгарија се земји каде мнозинството работници не работат во недела. Во Данска и Холандија неделата најчесто е работен ден. Во ЕУ, Хрватска е една од земјите со највисок процент на работници кои работат во недела, според Евростат.