НЕ ЗАПИРАЈТЕ СО УЧЕЊЕ: Онлајн можете да совладате вештини кои се чекор кон подобро утре

Добивај вести на Viber

Изучување на странски јазици oнлајн, совладување на нови ИТ вештини или нешто друго може да ви помогне полесно да најдете работа.

Младите денес имаат многу можности за учење онлајн и доколку тие опции ги користат, ќе ја збогатат својата биографија, а воедно во иднина ќе си обезбедат и приходи со помош на стекнатото знаење.  Подоцна можете да се вработите во некоја компанија или да станете фриленсер. Аудио, видеоматеријали, но и тестови има за совладување на странски јазици. За да видите резултати од вложениот труд, ќе треба да поминете месеци во едукација. За оние што сакаат дополнително знаење, на интернет има платформи со многу содржини на различни теми. Велат Јутјуб е „најголемиот бесплатен факултет“, а има и одлични курсеви по прифатливи цени.

„Ја учам сега за software tester, има академии кои нудат курсеви, сите се онлајн, на пример Браинстер или Севус и после од кога ќе научиш се заработува. И овде можат да најдат работа, има ИТ фирми и кај нас, а сепак работа во ИТ е постојана работа,  не си фриленсер. Курсевите траат околу 6-8 месеци. Се плаќаат, скапи се, ама вреди да се инвестира во себе“, вели девојка од Битола.

Секој според своите афинитети треба да избере за што ќе се едуцира.

„Од моето искуство, основи на маркетинг, продажба и copywriting е применливо во сите бранши и на секого може да му користи за да се продаде на пазарот, било како фриленсер, било за вработување во компанија или за да си основа свој бизнис. Останатото зависи од тоа кој што сака да работи“, вели фриленсерот Петар Тодоровски.

Maрина Арсовска од Алфабетико јазичен центар смета дека онлајн учењето ги дава истите резултати како класичното учење, а можеби дури и подобри резултати, затоа што луѓето се опуштени. Им советува на младите да учат и истражуваат затоа што секое знаење ќе им користи понатаму во животот.

„Поради пандемијата почнавме онлајн да држиме часови и многу од учениците  истражуваат повеќе, бараат материјали онлајн. На Инстаграм има многу Италијанци кои како професори даваат совети како треба да се зборува италијанскиот јазик. Може да се учи и да се вежба јазикот преку слушање на музика, гледање на филмови и читање книги. Ние нудиме и учење на шведски, холандски, норвешки јазик и не значи дека сите кои учат странски јазик ќе се иселат. Има одреден интерес и за јапонскиот јазик кај младите. Секое знаење е корисно“, вели Арсовска.

На јутјуб каналот има многу тренери за личен развој и психолози кои советуваат дека секој ден треба да учиме нови работи.

Податоците на Државниот завод за статистика(ДЗС) од пред неколку години покажаа дека граѓаните во Македонија најголем дел од слободното време го поминуваат пред телевизор, односно 40 проценти.

KAKO E ВО ЕВРОПА?

Во Европа сè повеќе млади луѓе учат вештини онлајн. Како што објави Евростат, меѓу земјите - членки на ЕУ, се издвојуваат нордиските земји Финска и Шведска. Во 2019 година, 21 отсто од луѓето на возраст од 16 до 74 години во Финска следеле курс преку Интернет во последните 3 месеци, во Шведска истото го сториле 18 отсто. Во Шпанија (15 отсто), во Естонија (14 отсто), во Ирска и Холандија (13 отсто) од луѓето следеле онлајн курсеви. Истото не е многу честа појава во Бугарија (2 отсто), Романија (3 отсто) и Латвија (4 отсто). Помеѓу истражувањето за 2017 година и истражувањето за 2019 година, учеството на луѓето што следат курсеви преку Интернет се зголемило во огромно мнозинство на земјите - членки на ЕУ. Најостриот пораст е забележан во Ирска, од 4 отсто во 2017 година на 13 отсто во 2019 година (+9 процентни поени (ПП)). Учеството на луѓето што учат од курсеви преку Интернет скокна во Малта и Финска.

foto freepik.com