НЕ НИ ПОНУДИЈА НИКАКВИ ПАРИ ДА ДАДЕМЕ ПОДДРШКА НА КЛИНИКАТА „ЖАН МИТРЕВ“: Пациенти се организираа да раскажат за нивните позитивни искуства

Добивај вести на Viber

Дваесеттина пациенти се потпишале, а дел од нив денеска се организирано се собраа пред приватната клиника „Жан Митрев“, за да, како што рекоа, искажат поддршка на кадарот кој ги лекувал додека биле болни од корона вирусот.

-Дојдов тука, пред Клиниката „Жан Митрев“ на своја инцијатива. Тука на овој лист сме потпишани 20-тина луѓе зошто сметаме дека јавноста треба да ја слушне и приказната и на пациентите кои се задоволни и кои имат позитивно искуство. Јас лично бев во многу тешка состојба, по само два дена од заразувањето, болеста ми ги нападна белите дробови, сатурацијата ми беше под 70. Сам се довозев до клиникава и веднаш ме презедоа. Завршив и на респиратор, а пред да ми биде направена хемофилтрација, ме прашаа и мене и мојот татко дали се согласувам. Веднаш по првата хемофилтрација мојата состојба се подобри. Хемофилтрацијата ми го спаси животот. Излегов од клиникава жив и сега се радувам на мојот 8-месечен син, рече еден од пациентите кои биле хоспитализирани во Клиниката „Жан Митрев“ заради компликации од корона вирусот.

Речиси идентично искуство сподели и друг пациент кој на прашањето на новинарите дали добиле некакви ваучери за да се соберат и да дадат поддршка, категорично негираше.

-Не, не сме добиле никакви ваучери. Пред да ми биде напоравена хемофилтрацијата моето семејство даде согласност, бевме прашани. Престојот тука ме чинеше 20.000 евра. Нешто имавме, нешто позајмивме. Не сум мал потреба по ковидот за лекарски прегледи, но доколку имам, сигурно ќе дојдам пак тука да се лекувам, истакна пациентот.

Инаку, овие пациенти во поканата за денешната прес конференција наведоа дека како пациенти на клиниката чувствуваат потреба да ја кажеме и нашата страна на приказната.