Намалување на струјата за 0,6 евра
Објавено во: Економија 27 Мај, 2018
Намалување на производствената цена на струјата за 1,5 отсто или за 0,6 евра, бара АД ЕЛЕМ од Регулаторната комисија на Македонија. Генералниот директор на државните електрани, вели дека поевтинувањето би се должело на позитивните финансиски резултати што ги постигна компанијата, оптималното искористување на производствените капацитети и продажбата на вишокот електрична енергија.
„АД ЕЛЕМ во барањето за определување на максималниот регулиран приход за 2018 година до Регулаторната комисија бара намалување на цената за АД ЕЛЕМ за 1,5 проценти. Ова е добра вест и се надевам дека и другите енергетски компании ќе не следат и ќе има на крај позитивен ефект врз сите граѓани на РМ“, рече директорот на ЕЛЕМ, Драган Миновски.
По честите дефекти и испади на термо блоковите во изминатиот период и проблемите во најголемиот производител на струја во државата, РЕК Битола, од термоцентралата најавуваат инвестиција од 10 милиони евра за ремонт на сите три блока, до почетокот на новата грејна сезона.
„Оваа година почнавме капитален ремонт на „блок 1“ и ремонтни активности на „блок 2“ и „блок 3“. Сакаме да бидеме комплетно подготвени и сите три блока да бидат во функција на почетокот на месец октомври и да се истера грејната сезона онака како што треба да биде, стабилна“, вели директорот на РЕК Битола, Васко Ковачевски.