На „Синцеритас“ му тргна на берзата, производителот на медицински канабис издаде втора емисија на акции

Добивај вести на Viber

Синцеритас АД Скопје, компанијата која произведува и тргува со медицински канабис во Македонија, ја издаде својата втора емисија на акции на берзата. Цената е едно евро за акција. Комисијата за хартии од вредност на вчерашната седница му даде дозвола да ја издаде втората емисија на акции за познати купувачи.

„Со втората емисија на акции, Синцеритас АД Скопје ќе издаде 190.500 обични акции со номинална вредност од 1 евро и продажна вредност од 11 евра по акција, односно номиналната вредност на сите новоиздадени акции изнесува 190.500 евра, додека вкупната продажна вредност на емисијата изнесува 2.095.500 евра.

Новоиздадените хартии од вредност ќе бидат запишани и уплатени од страна на 6 познати купувачи –странски физички и правни лица. Синцеритас АД Скопје издава нови акции заради прибирање на парични средства и создавање услови за непречено функционирање на Друштвото“, објави КХВ.

Претходно Синцеритас АД Скопје првата емисија ја издаде пред два месеци и тоа влезе во нашата корпоративна историја како прва компанија производител на медицински канабис чија акција се тргувала на нашата берза. И тогаш цената беше едно евро за акција. Во една блок трансакција беа истргувани 190.400 акции.

Оваа компанија е на листата на берзанскиот Слободен пазар и за неа има многу помалку информации во споредба со друштвата чии акции се листани на Официјалниот пазар на берзата. Според достапни податци од интернет страницата на ова акционерско друштво извршен директор е лицето Роберт Новески, кој воедно е потпишан и како основач на компанијата. Македонската компанија има, веројатно, капитална поврзаност со германското друштво Синцеритас ГмбХ.

„Sinceritas“ е компанија која на основа на земјоделски и фармацевтски техники произведува висококвалитетни медицински производи од канабис. Таргет се пациенти со ретки и тешко лекувачки состојби, а во друштвото се инвестира и во научно-истражувачка работа.

А.К.