На 5 јуни пресуда за пожарот во модуларната болница во Тетово
Објавено во: Македонија 29 Мај, 2023
Пресудата за обвинетите за пожарот во модуларната болница во Тетово во кој што животот го загубија 14 пациенти ќе биде соопштена на 5 јуни, објави судијата Јордан Велковски откако денеска во Основниот суд во Тетово денес се одржаа завршните зборови на Обвинителството и одбраната на обвинетите.
Според завршните зборови на Обвинителството, двајцата обвинети директори Флорин Бесими и Артан Етеми имале обврска да постават противпожарни апарат, а тоа не го исполниле. За обвинетиот доктор Бобан Вучевски, обвинителот посочи сведочења на роднини и рече дека дозволил присуство на роднини на пациентите.
Кон завршните зборови на Обвинителството се приклучија пет адвокати кои имаа полномоштво за застапување на семејствата на луѓето кои ги загубија животите во пожарот и повредните пациенти во модуларната болница. Тие во нивно име побараа од судот да ги насочи за надомест на штета и трошоци.
Адвокатите на Јавна здравствена установа Клиничка болница Тетово и на двајцата директори, како и на докторот, наведоа дека според сведочењата на вработени, имало поставени противпожарни уреди и дека установата имала истакнато наредби и правилници околу постапување кон прописите за време на пандемија.
Бесими и Етеми се обвинуваат за кривично дело „тешки дела против општата сигурност“, додека докторот Вучевски за „непостапување според здравствени прописи за време на епидемија“. Клиничката болница како правно лице се товари за две кривични дела, прво за „предизвикување општа опасност“ и за „непостапување според здравствени прописи за време на епидемија“.
Тие на почетокот на судењето истакнаа дека го разбираат обвинението но дека не чувствуваат вина. Судењето започна во декември 2022 година.