Меркел: Европа ја држи судбината во свои раце

Добивај вести на Viber

Германскиот канцелар Ангела Меркел ги отфрли обвинувањата за валутни манипулации од страна на американскиот претседател Доналд Трамп, предупредувајќи ги останатите земји членки на Европската унија (ЕУ), дека иднината на 28-члениот блок е во нивните раце, соопштува CNBC.

Коментарите на новиот претседател на САД против ЕУ се прилично сериозни, опишувајќи ја како "„инструмент на Германија“, фалејќи го Brexit и критикувајќи ја бегалската и монетарна политика на блокот.

Канцеларот Ангела Меркел изјави пред телевизијата дека „Европа ја држи судбината во свои раце“и треба да се фокусира на себе.

„Верувам дека колку појасни сме во дефинирање на улогата во светот, толку подобро можеме да управуваме со трансатлантските односи“, рече Меркел пред средбата на лидерите на ЕУ во Малта.

„Затоа разговорот за Европа, а не за други делови на светот, е на прво место во програмата за мене“.

Таа не даде дополнителни коментари за новата администрација на САД, велејчи дека оваа тема не е дел од програмата на средбата.

Европските лидери се собираат денеска во Малта, за да разговараат неформално за иднината на Европа по излегувањето на Велика Британија од блокот, како и миграциската политика.

Ова е прва средба на ЕУ, откако Трамп е инаугуриран и првата, откако тој отворено критикуваше некои европски лидери.

Претседателот на Европската комисија, Жан-Клод Јункер изјави за CNBC дека „има простор за толкување“ на некои од коментарите на претседателот.

Претходно оваа недела Трамп ја обвини Германија дека манипулира со еврото.

„Понекогаш останувам со впечаток дека новата администрација не ја познава во детали Европската унија, но деталите околу Европа имаат значење“ изјави тој за новинарите.