МАНУ: Во земјите од регионот и насекаде во светот, постои само една национална академија

Добивај вести на Viber

Бурни реакции има по барањето на Вреди за основање на Албанска академија на науките. 

Од Македонската академија на науките и уметностите(МАНУ) излегоа сo официјален став за формирањето на Албанската академија. Велат дека Академијата отсекогаш била отворена за сите граѓани кои ги исполнуваат високите научни и уметнички критериуми за членство во неа, независно од етничката, верската и каква било друга припадност. За политичките партии и нивните влијанија никогаш немало место во неа. 

Додаваат дека од нејзиното основање до денес, во МАНУ членови биле припадници на македонскиот народ, но исто така и на сите етнички заедници. 

„Меѓу другите, во последната декада во составот на МАНУ имаше четири члена од албанска етничка припадност (од коишто во трите последователни раководства еден беше научен секретар, а двајца потпретстедатели на Академијата, од кои еден е во актуелното раководство), како и три члена надвор од работниот состав. На крај, напоменуваме дека во Македонија, како и во земјите од регионот и насекаде во светот, постои само една национална академија која ја претставува државата во европската и во други меѓународни асоцијации на академии. Претседателството апелира МАНУ да не се вовлекува во дневнополитички расправи и партиски дискусии кои ја оптоваруваат редовната дејност на Академијата, а спаѓаат во доменот на Законодавниот дом и државните институции“, велат од МАНУ.

Академиците, кои досега излегоа во јавноста се против формирање на таква Академија. Велат дека во ниту една држава во светот не постојат две национални академии.