МАКЕДОНСКИОТ НАСПРОТИ ЕВРОПСКИОТ МИНИМАЛЕЦ: Во некои земји се заработува скоро девет пати повеќе
Објавено во: Економија 07 Февруари, 2020
Иако има покачување на минималната плата во Македонија, сепак таа е ниска ако се спореди во однос на државите од регионот и пошироко.
Македонецот зема скоро девет пати помал минималец од работниците на Луксембург, и 6.5 пати помал минималец од Германецот.
Македонските работници според висината на минималната плата, се најблиску со бугарските работници кои се на дното во Европа.
Македонија има минималец од 241,6 евра, а во јануари 2020 година, Бугарија имаше најниска минимална плата во ЕУ oд 312 евра.
„Кога се прави паралела, треба да се видат сите параметри, трошоци за живот, но дури и така ако се спореди, објективно имаме мали плати. Минималецот има многу мала куповна моќ. Со него не може да се обезбеди достоинствен живот. Платата не го следи растот на капиталот. Имаме неколкукратно зголемување на капиталот, а платите не се зголемени ниту за 30 отсто. Последниве години има движење кај минималната плата, но тоа не е доволно. Но, работите ќе се менуваат затоа што има одлив во странство, и ако сакаат да работат, газдите ќе мора да платат повеќе“, вели Пеце Ристески, поранешен претседател на СИЕР.
Девет држави членки, претежно лоцирани на истокот на ЕУ имаат ниски минимални плати. Во Латвија минималецот е 430 евра, во Романија 466, во Унгарија 487, во Хрватска 546 евра, во Чешка 575 евра, во Словачка 580 евра, во Естонија 584 евра, во Литванија 607 евра и во Полска 611 евра, покажува Евростат.
Португалија има минималец од 741 евра, Грција од 758 евра, Малта 777 евра, Словенија од 941 евра и Шпанија 1.050 евра.
Французите имаат минималец од 1.539 евра, Германците земаат минималец од 1.584 евра, Белгијците земаат минимална плата од 1.594 евра. Холандските работници имаат минималец од 1.636 евра, Ирците 1.656 и Луксембург од 2.142 евра.
Она што Евростат го забележува е дека во унијата има голем јаз помеѓу сиромашниот исток и богатиот запад.
Минималната плата во земјава од декември лани се покачи на 14.500 денари.
Сања Атанасовска