Македонија пат до Владата: Ќе рикнеме со старци и амортизирана опрема

Добивај вести на Viber

ЈП Македонија пат сумирајќи го годишниот извештај за 2017-та година ја повика Владата да стори се за да се внесе „свежа крв“ кај рабониците во претпријатието што го води Д-р Гајур Кадриу и да ја обнови застарената опрема. Во заклучокот за определување на насоките од таму алармираат дека просечната старост на кадарот е 52 години, а 95 отсто од машините се амортизирани.

- Доколку не ја добиеме поддршката и помошта соодветна на барањата кои се реални за да се одговори на задачата, може да се случи од преголема оптеретеност во посветеноста на Раководството за придвижување на резултатите и успех во работата да откажат постоечките ресурси. Затоа под итно предлагаме целосно реновирање на возниот парк и наитни вработувања за надминување на горенаведените тешкотии - пишува во дел од извештајот кој наликува на повик до надлежните.

Вкупната вредност на механизацијата која некогаш била купена ганц-нова и вредела 1,487 милијарди денари, сега вреди само 66,7 милиони денари, што е намалување на вредноста за 95 отсто. Од претпријатието се жалат до надредениот орган дека на овој начин само се прават непотребни трошоци за нејзино одржување и нови делови.

- Од овие показатели јасно се гледа дека процентот на амортизираност изнесува 95,51 отсто, што е повеќе загрижувачки во смисол дека претпријатието работи со скоро целосно амортизирана опрема, што е причина за многу високите трошоци за резервни делови и услуги за одржување во исправна состојба - се вели во извештајот, кој повеќе наликува на поплака.

Вкупните приходи за 2017 се безмалку милијарда денари, односно повеќе од 16 милиони евра и се намалени за 2,74 отсто во однос на една година претходно. Редовните приходи во вкупните изнесуваат со уество од 95 отсто што е висок процент и истите се намалени за 3,11 отсто во однос на 2016-та. Вкупните расходи се 931 милиони денари и се намалени за 5,77 отсто. Тука влегуваат потрошени суровини и материјали, трошоци за електрична енергија, трошоци за гориво, транспортни услуги и услуги за одржување и заштита, услуги за зимска служба, 

Обврските кон добавувачи се огромни и изнесуваат 521 милион денари, од кои 188 се со извршни судски решенија кои чекаат наплата во деловните банки. Неисплатениот ДДВ се уште е висок, а претпријатието должи и по една бруто-плата за вработените од крајот на минатата година. Од друга страна побарувањата се само 55 милиони и намалени се дури за повеќе од една третина за истиот период лани.

Бруто-платите бележат намалување за 3,14 отсто, а како причина се наведува намалениот број на вработени поради пензионирање и смрт. Бројот на работници е намален од просечни 804 на 790, а бруто-платата е 29.9 илјади, што е помалку од просечната.

Од залихите, снабдувањето е зголемено речиси на се, освен на личната заштитна опрема за безмалку 2,4 милиони денари помалку во однос на лани, или повеќе од 60 отсто.

Александар Кузмановски