Македонски пошти овозможи следење на пратките од странство купени онлајн
Објавено во: Економија 15 Август, 2017
Македонски пошти најавија функционирање на нов систем со кој ќе може да ги следат пратките од странство како што се купените испорачани производи и тоа преку електронски пат.
„Пратките од интернет нарачка кои пристигнуваат во Македонска пошта се трансформираат во книжени – препорачани пратки со лепење на посебен бар – код и се внесуваат во системот за следење на пратки на Македонска пошта, и покрај тоа што ниту една директива на Светскиот поштенски сојуз не нé обврзува на тоа“, известуваат од таму.
Сите граѓани кои купуваат од странски продавачи, пристигнувањето на нивната пратка во Македонска пошта и реализирањето на доставата веќе можат да го следат преку системот за следење на пратки на Македонска пошта, поставен на веб страната www.posta.com.mk.
„Со ова ќе ја зголемиме сигурноста на овие поштенски пратки и со високо изразена транспарентност ќе ги елиминираме сите сомневања за намерно или ненамерно губење на пратките од интернет нарачка во Македонска пошта. Остануваме и понатаму на страната на нашите корисници и ги охрабруваме за сите дилеми или незадоволства да не контактираат директно или преку доставување на онлајн рекламации на веб страната на Македонска пошта“, соопштуваат од Македонска пошта.
Оваа можност граѓаните ја чекаа подолго време бидејќи имаше поплаки за неиспорачани производи.