Лудило на војната! Гладуваат 300 милиони луѓе додека во украинска Одеса скапуваат милиони тони пченица
Објавено во: Економија 10 Мај, 2022
Во украинските силоси војната блокира милиони тони пченица. Тоа создаде околу 50 милиони луѓе кои немаат леб! Ако оваа пченица не се извезе сега ќе скапе, а најстрашно е тоа што идниот род пченица од украинските ниви (јули,август) нема каде да се складира, алармираа раководството на Светската програма за храна (WFP) на Организацијата на обединети нации (ООН)
Милиони тони пченица се блокирани во огромните силоси на пристаништата во јужна Украина. Сите силоси се полни со ланска пченица, а нејзниот извоз е блокиран со воените дејствија во Црното Море. Оваа состојба е неодржлива и ќе предизвика десетици милиони гладни луѓе, објави Дејвид Бесли, директорот на програмата за храна на ООН.
Тој апелира до украинскиот претседател Зеленски и рускиот претседател Путин да ги деблокираат пристаништата за да може пченицата да се извезе и да стигне таму каде што е најнеопходна. Тоа се всушност земјите на суб-сафарска Африка, а тешко ќе биде погоден и Египет, најсилната и најголема земја во северна Африка која е целосно зависна од украинската пченица.
Според проценките на оваа организација на ООН актуелниот број на околу 250 милиони гладни луѓе ширум светот сега веќе се зголемува на 300 милиони заради воената криза во Украина и блокадата на нејзината пченица.
Интегралниот текст на овој аларм на ООН може да го прочитате на следниот линк https://news.un.org/en/story/2022/05/1117722
Цената на пченицата на берзите галопира! За една година порасна повеќе од двојно
Цената на тон пченица на светските берзи достигна 410 евра! Ова е цена од последното тргување од 5 мај (последниот работен ден минатата седмица). Значи еден килограм пченица на големо на глобалниот пазар чини околу 25 денари! Најниската цена на тон пченица во период од една година наназад изнесувала 177 евра.
Кај цената на пченицата на глобалните пазари клучна улога има транспортот. Во смисла на тоа дека секогаш е најниска цената на пченицата што е произведена најблизу до локацијата на која треба да биде испорачана. Затоа на пример кај нас во Македонија секогаш најдобра цена за тон пченица може да даде Србија која е најголем производител во нашиот регион, а воедно е и наш сосед.
Пченицата е производ што се тргува на сите големи стокови светски берзи и на најголемата берза за деривати, деривативи и други форми на договори за набавка на стоки во иднина, а таа е CME Group.
Од најголемите стокови светски берзи кои ја креираат цената на основниот прехранбен продукт ги издвојуваме: берзата МАТ во Буенос Аирес, најголема во Јужна Америка, двете берзи во северна Америка од кои во САД е таа во Канзас Сити (КЦБТ) и другата е ВЦЕ во Винипег Монитоба, Канада.
Во Австралија пченицата се тргува на стоковата берза СФЕ во Сиднеј.
Во Европа најголеми берзи кои ја креираат пазарната цена на пченицата се унгарската БЦЕ, француската МАТИФ и неизбежната најголема берза во лондонски Сити – ЛИФФЕ.
Р.Ф.