ЛОКВЕНЕЦ: Новата форма на социјален живот е инвестиција во иднината, преку телефон се дружам со луѓето што ми се блиски

Добивај вести на Viber

Една работа е сигурна, а таа е дека коронавирусот и препораките од властите за заштита и превенција ни го промени начинот на секојдневно живеење. Нема излегување без потреба, нема кафе дружења со пријателите, а многумина, согласно одлуките на компаниите во кои работат, од дома ги извршуваат своите работни обврски.

Фактор разговараше со пратеникот Хари Локвенец, го прашавме како тој сега, во услови на превентивни мерки од коронавирусот, но и во време кога Собранието е распуштено, ги поминува деновите. Како се снаоѓа во оваа нова форма на социјален живот што ни ја наметнуваат мерките.

„Сето ова е инвестиција во иднината. Новата форма на социјален живот е всушност инвестиција на сите нас во заедничката иднина, во смисла дека сето ова мора да го пребродиме за да функционираме понатаму. Искуствата низ историјата покажале дека иако можеби не најголемите, но во секој случај поголемите изуми и уметнички дела се резултат на изолација која настанувала во вакви тешки периоди“, вели Локвенец. 

Како му поминува еден обичен ден? Сите петорица, заедно со децата и сопругта, се дома заедно, во стан од 79 квадрати. Најмалиот син има 11 години и е во основно училиште, средниот студира, а третиот во моментов се подготвува за постдипломски студии.

„Сите сме дома во овој период. Сепак, морам да кажам дека функционирањето во помал град е полесно отколку во Скопје, во смисла да се обезбедат потребните продукти. Тоа бара помалку време, бидејќи брзо се пристигнува до било кое место“, вели пратеникот.

Слободното време го користи и за политички ангажман, вели, јас како пратеник имам посебна одговорност кон граѓаните во вакви моменти. 

„Ова време го користам за помош на наши граѓани кои сакаат да се вратат од Хрватска, Словенија, Германија, нив мора да им се помогне како да дојдат дома. Еве, само утрово имав 20-тина телефонски повици за таа цел. Исто така, помагав во организацијата на Кризниот штаб во Прилеп околу превенцијата од коронавирусот. Јас сум претприемач и предавам менаџмент, и токму овој тип на организација и кризниот менаџмент ми се во крвта, тоа се дел од вештините за кои се обучував“, вели Локвенец.

Така што, објаснува, не може целосно да се препушти на изолацијата, туку мора и да ризикува и да излезе од дома, за да ги оствари неопходните контакти за оваа помош. Но, строго се придржува на препораките, оддалеченост од најмалку метар и половина, а со себе носи и маска и ја користи доколку има потреба.

Времето му поминува и во следење на состојбите со коронавирусот, не само во земјава, туку и во светот.

Дали му недостига кафепиењето со пријателите во некој од прилепските локали?

„Дома имам апарат за кафе, тоа е замената сега. Исто така, разговарам на телефон со пријателите. Социјалните мрежи помалку ги користам, знаете, јас сум од постарата генерација и преферирам телефонски да се слушнам со оние што ми се блиски“, вели за Фактор пратеникот Хари Локвенец.

Н.Н.Ф.