Лавина во пакистанско село уби 9 лица, а жртви брои и Авганистан
Објавено во: Свет 05 Февруари, 2017
Најмалку девет лица, меѓу кои четири жени и четири деца, загинаа денеска, додека тројца останаа заробени во лавина во село во северниот дел на Пакистан.
Несреќата се случила во 3 часот по полноќ по локално време во селото Шерсал во дистрикотот Читрал. Затрупани се осум куќи, а спасени се три лица, соопштуваат властите.
Овој регион е погоден од силно снежно невреме, а висината на снежната покривка на некои места достигнала висина од 1,2 метри.
Најмалку деветнаесет луѓе ги загубиле животите последните два дена во инциденти предизвикани од силните снежи врнежи во авганистанската покраина Бадакшан во северниот дел од Авганистан, соопшти портпаролот на покраинскиот гувернер.
Од 19-те жртви, седумнаесет биле жртви на лавина, уривање на покриви од објекти под тежината на снегот и во сообраќајни несреќи, рекол за Reuters Навид Фортан, портпаролот на гувернерот на покраината Бадакшан.
Според него, властите се обидуваат да воспостават врски со дванаесетте региони во покраините, коишто поради обилните снежни врнежи се отсечени од остатокот на светот.
Поради невремето отежнато е движењето по неколку главни магистрални правци во Авганистан, особено на патот кој ги поврзува Кабул и Кандахар. Таму во снегот се заробени околу 250 возила и автобуси, а за нивно извлекување се упатени полицијата и војската.