КРИЗАТА СТАСА И ВО ЏЕБОВИТЕ НА ЕВРОПЕЈЦИТЕ: Половина од нив стравуваат дека нема да можат да си ги платат сметките

Добивај вести на Viber

Речиси половина од Европејците стравуваат дека нема да можат да си ги платат сметките во следните шест месеци.

Покривањето на трошоците како отплата на хипотекарниот заем и превозот до работа е грижа на 48 отсто од испитаниците, а 37 отсто од нив ги користат заштедите за да врзат крај со крај, покажува истражувањето на Ипсос.

Инфлацијата во ЕУ зајакна по пандемијата поради наглото закрепнување на побарувачката што не беше усогласено со понудата. Во 2022 година, растот на цените дополнително се забрза, поттикнат од скокот на трошоците за производство, храна и енергија поради руската инвазија на Украина и западните санкции против Москва.

За да ја скроти инфлацијата, Европската централна банка (ЕЦБ) го промени правецот на монетарната политика и ги зголеми каматните стапки, па 10 отсто од испитаниците сега мора да плаќаат поголема камата на хипотекарните заеми поради договорите со променливи каматни стапки.

Скокот на цените на енергенсите се одрази на животниот стандард на граѓаните во ЕУ, а 71 отсто од испитаниците се обидуваат да ја намалат потрошувачката, а 28 отсто од нив го промениле начинот на превоз.

Ипсос го спроведе истражувањето во октомври и ноември минатата година во име на Европската комисија, на примерок од 1.000 испитаници по земја, вклучувајќи 27 земји од ЕУ, Исланд и Норвешка.