Комерцијална банка ја заврши 2014 со бруто-добивка од 109,4 милиони денари
Објавено во: Економија 25 Март, 2015
Aкционерите на Комерцијална банка АД Скопје денеска го одржаа своето редовно Годишно собрание.
Акционерите потврдија дека Банката ја заврши 2014 година со бруто-добивка во износ од 109,4 милиони денари. По пресметување на данокот на непризнаени расходи од 13,8 милиони денари, нето-добивката на Банката изнесува 95,6 милиони денари.
Тие донесоа Одлука за употреба и распоредување на нераспределената добивка во износ од 95,6 милиони денари и одлучија добивката да се издвои во резерви заради зголемување на вкупниот капитал на Банката и на книговодствената вредност на акциите на Банката.
На Собранието беа усвоени финансиските извештаи и консолидираните финансиски извештаи, како и Годишната сметка на Банката и Консолидираната годишна сметка на Банката за 2014 година, Програмата на мерки и активности на деловната политика и финансискиот план на Банката за 2015 година и Извештајот за усогласеноста на работењето на Банката со Кодексот за корпоративно управување на акционерските друштва котирани на Македонската берза.