Колку пари се прават од производство сувомесни производи?

Добивај вести на Viber

Над 35 милиони евра од продажба за половина година книжи „Пекабеско“ еден од најпознатите македонски брендови на сувомесни производи. За половина година оперативната добивка е 1,2 милиони евра, а нето добивката е 1 милион евра.

Најголемата македонска индустрија за производство на сувомесни производи „Пекабеско“ за првите шест месеци годинава оствари приходи од 35,3 милиони денари од продажба, покажуваат официјалните податоци од билансот на успех што го објави оваа компанија. Податоците покажуваат дека растат приходите од продажба и на домашниот и на странските пазари. До крајот на јуни „Пекабеско“ на домашниот пазар продал прехранбени продукти во износ од 31,2 милиони евра што е за 4 отсто повеќе од однос на истиот период лани. На странските пазари компанијата успеала да ја зголеми продажбата за 26 отсто во споредба со истиот период лани и таа достигнала 4,1 милиони евра за половина година. Приходот од продажба за првото полугодие пораснал за 7 отсто во однос на лани, односно за 2,2 милиони евра, а расходите за помалку од 1,5 милиони евра.

Оперативните расходи за половина година се 34,58 милиони евра и тие се зголемени за 5 отсто во споредба со лани. Најголема расходна ставка е набавната вредност на трговските стоки која за шест месеци изнесува 24,4 милиони евра и пораснала за 8 отсто во однос на истиот период лани. Втора по значење расходна ставка е трошокот за суровини и други материјали кој изнесува 6,57 милиони евра. Трошокот за вработените за половина година е 1,6 милиони евра и е за 5 отсто понизок од истиот период лани.

Добивката за пола година е милион евра, 35 отсто повеќе од лани!

Оперативната добивка на „Пекабеско“ за половина година е 1,215 милиони евра и таа книжи раст од 34 отсто во споредба со лани. Скопската прехранбена компанија оствари нето добивка од 1 милион евра за половина година и тоа е раст од 35 отсто во споредба со истиот период лани. 
Од билансот на состојба се гледа дека вкупните обврски на компанијата се 19,3 милиони евра и тие во однос на истиот период лани пораснале за 7 отсто. Тековните обврски кои се дел од обврските изнесуваат 12 милиони евра и пораснале за 11 отсто во споредба со истиот период лани.  

„Пекабеско“ е компанија основана во 1979 година. Доминантна дејност и е производство на сувомесни прехранбени производи, а од 1998 година започнува да ги произведува своите продукти под брендот „Пекабеско“. Оваа компанија освен сопствениот производен асортиман врши дистрибуција на повеќе од 250 производи на други домашни и странски компании. Најголем акционер е Слободан Кутревски, прв извршен директор, сопственик на 79 отсто од акциите.

Р.Ф.