Кој македонски супер бренд во корона ја зголеми добивката за 4 пати?

„Прилепска пиварница“ лани имаше исклучително успешна година. Добивката достигна 1,34 милиони евра, што е за четири пати подобар резултат од 2019 година и тоа во услови кога заради пандемијата приходите се намалени за 15 отсто, покажуваат официјалните финансиски резултати на единствената домашно поседувана пиварница.

Менаџментот на „Прилепска пиварница„ лани имаше исклучително прецизна и ефикасна стратегија која даде одличен резултат. Оптимизацијата на трошоците секогаш беше три чекори пред намалените приходи и тоа овозможи друштвото да оствари профит од 1,3 милиони евра. И при тоа менаџментот успеа да ги намали обврските на друштвото за 14 отсто. Навистина исклучителна година.

Приходите од продажба лани, заради бројните ограничувања особено во вториот квартал, изнесуваа 26,1 милиони евра што е за 15 отсто послабо од 2019 година. Речиси целиот приход од продажба друштвото го реализира на домашниот пазар. Продажбата дома на друштвото му донесе 26,09 милиони евра.

Оперативните расходи на компанијата лани изнесуваат 25,2 милиони евра и се за 20 отсто пониски од претходната споредбена година. Најголемата расходна ставка се трошоците за суровини и други материјали и тие изнесуваат 10,5 милиони евра. Тоа е за 10 отсто помалку од 2019 година. Набавната вредност на трговските стоки лани однесе 4,6 милиони евра што е за 39 отсто помалку од претходната година. Најголем процентуален пад од 42отсто има кај останатите трошоци од работењето кои лани изнесуваат 2,05 милиони евра.

Со ваква оптимизација на трошоците менаџментот успеал лани да оствари оперативна добивка од 1,2 милиони евра и тоа е неспоредливо подобар резултат од лани кога компанијата завршила со минимална загуба од оперативното работење.

Значаен стимул на крајниот резултат дадоа и финансиските приходи на друштвото кои лани изнесувале 303.000 евра, а по одземање на финансиските расходи на компанијата и носат 269.000 евра. Нето добивката на „Прилепска пиварница“ лани изнесува 1,34 милиони евра.

Од податоците од билансот на состојба вреди да се истакне дека лани се намалени обврските за 14 отсто и тие изнесуваат 3 милиони евра. Останатите побарувања лани биле на ниво од 11,5 милиони евра, а книговодствено компанијата има акумулирана добивка од 27,5 милиони евра.