Кој ќе обезбедува бесплатен јавен ви-фи интернет?

Добивај вести на Viber

Владата ќе обезбедува бесплатен државен вифи на отворени јавни површини до април 2022 година со поставувавање на безжична локална мрежа, а носител на проектот треба да биде јавното претпријатие Национална радиодифузија.

Основна дејност на ова јавно претпроијатие формирано од Владата е мрежно поврзување на институциите од јавниот сектор и локациите за бесплатен WiFI интернет пристап во единиците на локалната самоуправа на националната  оптичка транспортна мрежа, како и обезбедување интернет каде нема доволен комерцијален интерес за инвестиции за ваков вид на мрежи. Основна дејност се бежичните телекомуникации и одржување на радиодифузна мрежа на територија на земјата.

Претпријатието има вработени 120 лица на крајот на 2020 и бројот се намалил за 21 вработени за една година, а поседува мрежа од 135 предаватели и репетитори, како и други радиодифузни објекти и антенски системи

Во текот на 2020 година друштвото можеше да си дозволи одобрување на бескаматна позајмица на износ од 70 милиони денари за надминување на деловната криза на ЈП Национални Шуми. Претпријатието има и ненаплатени 430.396.000 денари по укинувањето на наплатата за радиодифузна такса во Македонија.

ЈП Национална радиодифузија во 2020 потрошило 300.000 евра повеќе за договори за нови привремени вработувања. Во просек од националниот буџет добива по 4 милиони евра и повеќе, претежно преку Министерството за информатичко општество и администрација, а остварената добивка во 2020, иако била кризна ковид-година, изнесувала 40 милиони денари.

Низ минатата година се потрошиле 71,5 милиони денари за плати, или 5 милиони повеќе во однос на 2019.

Листата на локации кои ќе нудат беспалтен ви-фи интернет треба да се направи во соработка со Министерството за информатичко општество на Македонија, односно Агенцијата за промоција и поддршка на туризмот и локалните самоуправи.

„До крајот на април 2022 година, во соработка со Министерство за информатичко општество и администрација, Национална канцеларија за бродбенд компетентност и Агенцијата за електронски комуникации ќе се одржат јавни состаноци со заинтересираните оператори и локалните самоуправи за реализацијата на обезбедувањето бесплатен безжичен вифи на одобрените локации, информираат од владината прес-служба“, информираше претходно Владата.

А.К.