Има ли опасност да настрада историски објект, во проширувањето на булеварот „Никола Карев“, или популарно налечената Пластичарска улица.
Еден читател на Фактор ни испрати фотографии од кои се гледа дека при рушењето на ридското земјиште, на местото пред влезот на Касарната „Илинден“, што е неопходно да се направи за да се прошири улицата, има остатоци од стар објект со тули, односно ѕидови, кои ќе мора да настрадаат при ископувањето на таа површина.
Нашиот читател вели дека до пред неколку дена се гледал и кров на објектот, како и црвени цигли, но тоа е сега срушено.
Најверојатно градежните машини работеле и за време на велигденските празници, бидејќи има голем напредок во ископувањето во однос на четвртокот минатата недела.
Така што, немаме фотографии кои поконкретно би посведочиле за каква точно градба станува збор, но во секој случај е евидентно дека се работи за постар објект, кој датира од многу одамна. Дали станува збор за вредно археолошко богатство, надлежните сигурно ги имаат потребните одговори.
Неодамна, односно на 17 априли, градоначалникот на Скопје, Петре Шилегов, објави дека започна завршната фаза на асфалтирање на бул. Никола Карев, односно Пластичарска.
За оваа акција беа презентирани и фотографии.