Ќе може ли сами да си доплатиме за пензија од среда?

Добивај вести на Viber

Предизборните измени од Законот за пензиското и инвалидското осигурување изгласани минатиот месец треба да започнат од среда, а од ПИОМ велат дека технички ништо не може да ги спречи истите да можат да се остваруваат. Од Пензиско – инвалидскиот фонд претходно информираа дека околу 60 илјади лица ја чекале оваа можност, за која мнозинството во Собранието брзаше да ја усвои пред да се распушти.

Со овие измени се дава можност осигуреникот да може самиот за себе да изврши плаќање на придонесот за пензиско и инвалидско осигурување доколку ја исполнил старосната граница за пензионирање а го нема потребниот стаж. Лицата кои наполниле 65 години, односно 63, а немаат 15 години работен стаж поради неплатени придонеси, ќе можат да ги откупат тие години, односно месеци, од стажот за да добијат старосна пензија.

„Фондот на пензиското и инвалидското осигурување е подготвен да го спроведе Законот за дополнување на Законот за пензиското и инвалидското осигурување, кој е објавен на 10февруари 2020 година, влезе на сила на 18 февруари 2020 а ќе се применува од 18 март 2020 година“, гласи категорично одговорот кој го добивме од Фондот.

Основицата за пресметка и плаќање на придонесот изнесува 20 отсто од просечната плата за претходната година од годината во која е поднесено барањето за плаќање на придонес за пензиско и инвалидско осигурување. Од претходно беше утврдено дека на повеќето граѓани им фали стаж од неколку месеци, но има и такви на кои им фалат по три или повеќе години.

Плаќањето на придонесот за пензиско и инвалидско осигурување може да го извршат и членовите на семејството заради остварување право на семејна пензија со поднесување на барање до филијалите. Уплатата на придонесот граѓаните ќе можат да ја извршат откако ќе го добијат решението.

Претходното законско решение за докуп на стаж кое беше донесено во 2015 година, имаше ограничено важење  од една година, за разлика од ова законско решение кое нема ограничување во важењето.

Платите остварени од 1970 до 2019 година што се земаат за утврдување на пензиската основа се пресметуваат според просечната плата на вработените во земјата од 2019 година, како последна календарска година што и претходи на годината во која осигуреникот го остварува правото на пензија.

Висината на пензиските основици за осигурениците и лицата кои не оствариле плата односно надоместок на плата по 1 јануари 1970 година за висока стручна подготовка...…23.841 денари, за виша стручна подготовка или подготовка за висококвалификуван работник 19.892, за средна стручна подготовка или подготовка за квалификуван работник 18.049, за полуквалификуван работник односно нижа стручна подготовка.15.926 и за осигуреници и лица без стручна подготовка -15.350 денари.

Овие износи се сметаа како просечна плата остварена во 2019 година и служи за утврдување на пензиската основа на осигурениците односно лицата кои не оствариле плата, а кои право на пензија остваруваат во 2020 година.