КАЗНИ ОД НАРОДНА БАНКА: Јавни објави за прекршителите

Добивај вести на Viber

И Народната банка како Управата за јавни приходи на интернет страницата јавно ги објавува физичките лица и фирмите кои треба да платат прекршоци, а решенијата за казните не успеала да им ги достави на адреса поради нивно неприсуство. Кои физички лица може да ги казнува Народната банка и зошто? Оттаму за Фактор велат дека имаат ингеренции да казнуваат физичи лица ако tie се одговорни лица во институција која Народна банка има надлежност да ја контролира, како банки или менувачници на пример.

За неколку дена на интернет страницата на НБРМ излегоа две вакви објави за доставувања – едната за физичко лице, другата за менувачница. На двете стои дека Народната банка не успеала да им ги достави решенијата, па доказот дека прекршителите се известени е пуштен јавно.

Иако имињата и на физичкото лице и на фирмата се објавени јавно на страницата, од Народната банка за Фактор велат дека сите податоци од супервизијата што ја прави Народната банка се класифицирани со степен „интерно“ и се „професионална тајна“. Затоа од НБрм велат дека не може да објавуваат детали за тоа зошто се казнети лицата.

„Народната банка издава Записници за констатиран прекршок и прекршочен платен налог кон физичко лице, во случаи кога ќе утврди прекршок во работењето на институција која е предмет на супервизија согласно со Законот за банки, Законот за Девизно работење, Законот за Платен промет и сл, а за прекршокот е предвидена глоба и за физичкото лице – одговорно лице во правното лице. Јавната објава на веб-страницата на Народна банка е предвидена со Законот за прекршоци во случај кога доставата на Записникот за констатиран прекршок и прекршочен платен налог на домашна адреса на физичкото лице во два наврати ќе биде неуспешна, стои во одговорот од Народната банка.

А.Т.