Катица Јанева поднесе оставка пред да и истече мандатот

Добивај вести на Viber

Катица Јанева, шефицата на Специјалното јавно обвинителство, попладнево поднесе оставка откако премиерот Зоран Заев најави дека в петок ќе има лидерска средба на која на дневен ред ќе биде и Предлог-законот за Јавно обвинителство.

„Во моментот кога со консензус на сите политички партии бев избрана за Специјален Јавен Обвинител, себеси и на граѓаните на Република Северна Македонија ветив дека функцијата Специјален јавен обвинител ќе ја извршувам во интерес на владеењето на правото и борбата против криминалот и корупцијата во Република Северна Македонија. Се нафатив на функцијата во исклутелно тешки околности и целосно свесна за задачата која ми е дадена.

Чест ми беше да и служам на државата и да бидам на чело на исклучително професионален обвинителски тим, истражителски тим и тим на вработени кои безрезревно и посветено ги извршуваат своите работни задачи. Со месеци ги следам медиумските прилози за преговорите меѓу работните групи на политичките партиите за иднината на Специјалното јавно обвинителство. Еве, денес ја користам приликата да ја информирам јавноста дека јас нема да дозволам моето име да биде искористено за нечие алиби со кое во заложништво ќе се држат судбината на Специјалното јавно обвинителство и Европските интеграции на мојата земја.

Ја депонирам мојата оставка која ќе стане активна тогаш кога политичките партии ќе се усогласат за новото законско решение и ќе го изберат мојот наследник“, се вели во соопштението.

Јанева ја објави оставката пред да и истече мандатот на 15 септември, до кога актуелната власт и опозицијата трее да постигнат консензус за продолжување на судбината на СЈО. Инаку пред неколку дена Заев во своето гостување во телевизијата Клан Македонија рече дека единствено нерасчистено е тоа кој ќе биде лидер на ова обвинителство, односно дека само името „Катица Јанева“ останува трн во окото на ВМРо-ДПМНЕ.

„Дозволете, јавно да се заблагодарам на целиот тим на Специјалното јавно обвинителство со кој испишавме историја. Треба да бидеме горди затоа што претставуваме симбол за бескомпромисна борба против највисоките облици на организиран криминал и корупција.

Ја користам приликата да се заблагодарам на сите граѓани и на медиумите кои со довербата во нас и поддршката која ја даваат се ветер во грб за одговорната работа која ја вршиме. Бев и ќе останам подготвена да се борам за подобро утре на сите граѓани на Република Северна Македонија“, се додава во соопштението.