Карантините остануваат, Владата засега не размислува за скратување на полицискиот час

Добивај вести на Viber

Карантините остануваат, рече министерот за здравство Венко Филипче на денешната прес конференција.

„Сметам дека е одлична мерка карантин од 14 дена, имаме разговори со министрите за здравство од околните земји, бидејќи имаат најави за нивни политики за кои сметаме дека треба да сме искоординирани. Веќе сме во поселедна фаза на подготовки и состанок со министерот за здравство на Грција, да видиме дали ќе се искоординираме. Сето тоа мора добро да се усогласи, да видиме дали ќе се постави некаков критериум, за да бидеме спремни кога ќе препорача да се отворат границите, да знаеме што да правиме со нашите граѓани кои ќе можат да патуваат во странство, со граѓаните кои доаѓаат од други земји, и со граѓаните кои транзитираат“, рече Филипче.

Досега не се размислувало за скратување на полицискиот час, но состојбата се следи.

„Досега не размислувавме за скратување на полицискиот час, но може да се наметне потреба во периодот кој доаѓа, посебно за економските оператори кои постепено се враќаат во функција. Значи, ја следиме состојбата, доколку треба апсолутно ќе предложиме до Владата, но засега не“, нагласи министерот.

За протестот кој е најавен пред Владата за 17 мај, Филипче рече дека граѓаните треба да бидат свесни дека сите досегашни рестриктивни мерки не донесоа до тука да имаме мал број пациенти. И затоа тој им честита на граѓаните.

„Сега треба да се издржи уште малку, би сакал да поразговарам со организаторите и искрено се надевам дека ќе го откажат протестот. Ако сепак дојде до него, верувам дека институциите ќе реагираат тој да биде на дистанца и со носење маски“, нагласи министерот.

За лекарите и медициснките сестри кои работеа со пациенти со КОВИД-19, се размислува за награда. 

За стоматолозите има соодветен протокол, дел се спремни и веќе можат да почнат со работа, а другите откако ќе завршат со подготовките.