Каква иницијатива му испрати Апасиев на Џафери?
Објавено во: Македонија 11 Ноември, 2022
Претседателот на Левица, Димитар Апасиев на собранискиот претседател Талат Џафери повторно му ја испратил истата иницијатива за референдум дополнета со алтернативно прашање.
„Дали сте за преговори со ЕУ со прифаќање на собраниските ставови содржани во Заклучоците од 16 јули 2022”, гласи одговорот на Апасиев до спикерот Џафери кој од него побара корекција на првичната инцијатива за референдум.Лидерот на Левица му навел на собранискиот спикер дека има низа пропусти, нелогични толкувања и неточни констатации на првата верзија. Тој бара итно новиот предлог да биде проследен на матичните комисии, а во спротивно се закани со кривична пријава, судски спор, како и целосна блокада на Собранието.
„Во известувањето (од Џафери) од правен аспект има неколку бисери. Првата смешка на која спикерот се повикува е тоа што цитира сосема погрешни членови од Деловникот, ме третира како пратеник што во случајов не е така, јас сум во својство на физичко лице. Следната смешка на која искрено „се цепев” од смеење е тоа што заборавил во темплејтот во кој го враќал известувањето, ако се сеќавате за Христијан Мицкоски во својство на овластен предлагач поради тоа што не можело да се оспоруваат меѓународни договори, во случајов заборавил да го тргне Џафери, иако јас не се повикувам на таков закон за ратификација“, кажа Апасиев.
За Апасиев се спорни и уставните измени за кои власта бара широк консензус во Парламентот. Вели дека Левица ќе се согласи тогаш кога ќе има реципроцитет за Македонците во Бугарија.
Претходно, Џафери ја врати на доработка иницијативата на Левица. Иницијатива за референдум поднесуваше и ВМРО-ДПМНЕ, но спикерот ја отфрли.