Како „Макпетрол“ ја заврши деловната 2015 година?
Објавено во: Економија 13 Јуни, 2016
Во деловната 2015 година Друштвото успеа да оствари продажба на нафтени деривати, биодизел, глицерин и природен гас во висина од 347.542 тони што претставува зголемување во однос на истиот период лани кога е остварена продажба во висина од 315.480 тони.
На Собранието на акционери на „Макпетрол“ кое се одржа викендов се донесени повеќе одлуки меѓу кои одлука за усвојување на годишниот извештај за 2015 година.
Усвоена е одлуката за распоредување на добивката, одлука за зделка со заинтересирана страна, одлука зa усвојување на Годишната сметка и Финансиските извештаи 2015, одлука за усвојување на Kонсолидираната Годишна сметка и Kонсолидирани Финансиски извештаи, одлука за одобрување на работењето на членовите на Управниот одбор одлука за одобрување на работењето на членовите на Надзорниот одбор, одлука за усвојување на Извештајот на Надзорниот одбор, одлука за усвојување на Годишниот извештај на Управниот одбор и одлука за определување на ревизори на Финансиските извештаи.
Преку Македонската берза соопштија дека минатата година се остварени позитивни резултати во работењето.
„Во овој период остварен е вкупен приход во износ од 18,6 милијарди денари кој е помал од минатогодишниот за 1,9 милијарди денари или 9,5 и.п. Ваквото намалување на приходите се должи на ефектот од намалувањето на цените на дериватите во однос на истиот период од минатата година“- стои во извештајот.
Во истиот период остварени се вкупни расходи во висина од 18,4 милијарди денари што преставува намалување во однос на минатата година за 2,2 милијарди денари или 10,6 и.п. во што повторно најголем удел има намалувањето на цените на дериватите.
Набавната вредност на стоките со кои тргува Друштвото изнесува 16,3 милијарди денари во 2015 година и учествува со приближно 88% во искажаните вкупни приходи и расходи и е за 11 и.п. намалена во однос на 2014 година кога изнесувала 18,4 милијарди денари.
Висината на набавната вредност, во услови на искажан пораст на количествениот промет, зависи од нивото на пропишаните цени на горивата. Тие се менуваат на секој две недели во текот на годината од страна на Регулаторната комисија за енергетика.